Njuike sisdoaluide

Ánte Tenoranta oažžu skihpáris 50 euro, jus lea soahtebálvalusas Avvila rádjejeagárkompaniijas loahpa rádjái – "Dat lea viehka garra báiki"

Avvila rádjejeagárkompaniijas álggii fas ođđa áigodat, go soalddátálggut lávkejedje sisa rádjejeagárkompaniija uvssain. Okta sis lea gáregasnjárgalaš Ánte Tenoranta, geasa dehálamos lea oahppat birget hástaleaddjige birrasis.

Karigasniemeläinen Ánte Tenoranta aloitti varusmiespalveluksensa Ivalon rajajääkärikomppaniassa 4.7.2022.
Gáregasnjárgalaš Ánte Tenoranta ja avvillaš Iiro Niemi eallimis lei gelddolaš beaivi, go soai leigga bovdejuvvon álggahit soahtebálvalusas bivnnuhis ja hástaleaddji Avvila rádjejeagárkompaniijas.

Avvila rádjejeagárkompaniijas lei ikte vuossárgga oallelágan hušša, go čuođit ođđa soalddátálggut miehtá Suoma bohte álggahit iežaset soahtebálvalusa.

Gáregasnjárgalaš Ánte Tenoranta lei buriin mielain, go viimmat guhká vurdojuvvon beaivi de bođii. Áidna, mii su vehá fuolastuhtii lei friijavuođa manaheapmi. Dego juo dákkár áššiiguin láve, lea Tenorantage gullan guhká skihpáriin ja oahppásiin márkanságaid ja šláddariid das, makkár báiki Avvila rádjejeagárkompaniija duođas lea.

Gohan fal nahkkarat eai rohtte boastto sajis, čaibmá Ánte Tenoranta ovdal go vuolgá soahtebálvalussii.

– Skibir lea dadjan munnje, ahte son addá munnje 50 euro, jus lean loahpa rádjái Avvilis. Go dat lea viehka garra báiki ja doppe lea dakkár ceavzinhárjehus, man áigge máŋgasat vulget várra eret, go ii oaččo máŋgga beaivái borrat dahje oađđit albmaláhkái, muitala Tenoranta.

"Váikkuha olu, maid don máhtát gárvvisin"

Soahtebálvalusas dehálaš oassin leat guhkes vánddardanmátkkit, ijaid gohcin ja garra hárjehusat, main albmaláhkai testejit olbmo fysalaš ja psyhkalaš gierdevašvuođa. Tenoranta árvala, ahte Avvilis dehálamos ii goit leat fysalaš foarbma, baicce dat, makkár hárjánupmi ovdalaččas lea.

– Dus ii dárbbaš leat hirbmat, hirbmat, hirbmat buorre foarbma, muhto dat váikkuha viehka olu, ahte maid don máhtát juo gárvvisin. Jus leat leamašan muđuige eallimis meahcis, de don birget dainna doppe, Tenoranta jurddahallá.

Soalddátálgu Ánte Tenoranta almmuha iežas soahtebálvalussii Avvila rádjejeagárkompaniijas ja friijavuohta lea virggálaččat goit veháš áigái manahuvvon. Govva: Kirsti Länsman / Yle

Ánte Tenoranta diehtá gal dárkilit, mii šaddá su stuorámus hástalussan soahtebálvalusas: dat, go ii oaččo oađđit nu guhká, go ieš juo háliida. Son lohká, ahte nohkasta vaikkoba bovnna ala, jus váibasat deivet.

– Mun sáhtán oađđit gos beare, jus lean doarvái váiban. Ja dalle dat easkka suhttetge dat stuorra olbmot, jus mun beare nohkastan juohke báikái, čaibmá Tenoranta.

Avvil lea diđolaš válljejupmi, soahtedilisge

Sii leat vuosttažat, geat álggahit soahtebálvalusas nu, ahte ránnjáriika lea fallehan nuppi riikka. Dat lunddolaččat bohciidahttá jurdagiid, go soahtedilli lea boahtán nu lahka. Maiddái Ánte Tenoranta mielas ášši lea vássán áiggiin jorran.

– Galhan dat váikkuha, ahte gal dan smiehttá, Tenoranta vástida.

Tenoranta lea jurddašan maiddái dan, ahte makkár bálvalusbáikái son manná. Avvil ii leat dat buot álkimus, iige eisege soahtedilis, muhto liikká son livččii dohko áigon, leš dilli makkár beare.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat