Njuike sisdoaluide

Katja Gaurilooff Jeʹvida-fiʹlmme ooʒʒât vieʹǩǩteeʹjid – fiilm fiʹlmmjet sueiʹnnmannust Čeʹvetjääuʹrest

Maaiʹlm vuõssmõs nuõrttsääʹmǩiõllsaž Jeʹvida-fiktiofiilm fiʹlmmjet sueiʹnnmannust Čeʹvetjääuʹr vuuʹdest. Fiʹlmme ooʒʒât pääiklaž vieʹǩǩteeʹjid čuäjtõõllâd fiilmâst.

Katja Gauriloff juätkk Jeʹvida-fiktiofiilmâst Mannu mieʹcc Kaiʹssi -dokumeʹnttfiilm mainnâz. Govva: Juulia Klemola

Jeʹvida-fiilm ohjjeei Katja Gauriloff lij leämmaž sami ǩirrsaž mõõnni ääiʹj, ku fiʹlmmjem lij eʹpet äʹlǧǧmen. Fiiʹlm täʹlvvfiʹlmmjem leäi pâʹsslašttâm-mannust da ååʹn lij ǩieʹssfiʹlmmjem vuârr.

– Tälvva fiʹlmmjim muäʹdd neäʹttel Čeʹvetjääuʹrest da puk lij mõõnnâm sami puârast. Tõʹst lij šiõǥǥ juäʹtǩǩed ooudårra, mušttal Gauriloff.

Fiʹlmmjem peštt 3–4 neäʹttel da älgg Heʹlssnest.

– Vueʹss fiʹlmmjummšin lij serddjam tok. Teä seʹrddep tââvas da fiʹlmmjep šuurmõs vueʹssen Čeʹvetjääuʹr vuuʹdest di možât muäʹdd peeiʹv Âʹvvel vuuʹdest.

Jeʹvida-fiilm čuõppmõš da jiõnntuâjai tuejjummuš äʹlǧǧe še sueiʹnnmannust. Filmm valmštââvv tän eeʹjj ääiʹj.

Ohjjeei Katja Gauriloff maainast Jeʹvida-fiilm fiʹlmmjem pirr.

Mõõnnâmäigga sâjjdõõtti fiilm fiʹlmmjet čaʹppesviõlggeen

Jeʹvida-filmm sâjjdââtt 1950–60-lååǥǥaid. Pukin vääžnmõs lij vaʹlljeed da raajjâd nåkam fiʹlmmjempääiʹǩid, što fiilm ääiʹjpodd kuâsttjeʹči vuõiʹǧǧest. Kameratuâjast da fiilm euʹnnummšest še lie jõnn rool vuäʹmm ääiʹj toobdâlm raajjmõõžžâst.

– Mõõnnâmääiʹj kovvõõzzâst vieʹǩǩat tõt, što filmm lij obbnes čaʹppesviõlggâd. Mij-han leäʹp mättjam, što vuäʹmm snimldõõǥǥ da materiaal lie čaʹppesviõlggâd.

Čuäjtõõli da vieʹǩǩteei ålggvueʹjj vääʹldet še tärkka lokku.

– Ij vueiʹt kuâsttjed ânnʼjõžäiggsaž vuõpttmaall, čieʹǩrdõõzz jie-ǥa pirstõõzz leʹbe teeʹkst leeʹšǩ âʹlnn.

Tälvva fiiʹlm vieʹǩǩteei čuäjtõʹlle ruõkkmõškuõʹssid. Tän vuâra vieʹǩǩteei vuäǯǯa påǥsted fiʹlmmjummšin.

– Meeʹst lij pueʹttmen kaʹdrelsiõrrmõš, koon vääras ooʒʒam juõʹǩǩnallšem vieʹǩǩteeʹjid, jeäʹrben nuõrab oummid. Mõõnni tääʹlv meeʹst leʹjje tuõđi fiin vieʹǩǩteei da tuäiv mieʹldd ååʹn mij vuäǯǯap jiânnai vieʹsslõs vieʹǩǩteeʹjid di što meeʹst lij hääʹsǩ fiʹlmmjummšin, särnn Gauriloff.

Jeʹvida-fiʹlmme ooʒʒât vieʹǩǩteeʹjid kooum peeivas Čeʹvetjäurra. Fiʹlmmjempeeiʹv lie 19.7., 22.7. da 26.7. Fiilm vieʹǩǩteei vuäǯǯa uʹcc koʹrvvõõzz. Vieʹǩǩteeʹjen vuäitt piâssâd, jõs väldd õhttvuõđ puuʹtʼtemkoordinaattooʹre, kååʹtt lij Marjo Markkanen, leʹbe Gauriloʹffe.

Looǥǥ lââʹzz:

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.