Njuike sisdoaluide

Sámis leamaš dán geasi báhkka dálkkiid dihte moanat eanabuollimat, Anárjávrris buollái suollu – máŋgii čáskkadeapmái dárbbašit helikopteriid

Báhkka dálkkiid geažil maiddái Sámis lei badjelaš vahku fámus eanabuollinváruhus. Buollinčáskadanhoavda Jussi Hannukari muittuha, ahte vaikko dálki čoskkošii, ii oaččo vajálduhttit dola cahkkeheami riskkaid meahcis.

Sakke Kaitsalo govvestii 2.7. Anárjávrris sullo, mas lea viiddes eanabuollin. Govva: Sakke Kaitsalo

Báhkka dálkkit mielddisbuktet unohas dili, go meahcis buollá fáhkka ja viidát, ja šaddá hoahppu dan čáskadit. Sámis leat velá guhkes gaskkat, ja buollát sáhttá vaikko geainnuhis vuovddis dahjege sullos. Ovdamearkka dihte suoidnemánus goardi báhkaid áigge Anárjávrris buollái maiddái okta suolu.

Dán geasi eanabuollimat leatge leamaš miehtá Sámi ja Davvi-Suoma, go lieggagráđat ledje máŋggaid beivviid maŋŋálagaid badjel 30.

Dákkár eanabuollimiid mearri lea goittotge Nuorta-Lappi buollinčáskadanhoavda Jussi Hannukari mielas dábálaš, jus jurddaša lieggagráđaid ektui ja dan, ahte eanan goikkai.

– Goikes báhkkadálkkiid baji áigge eanabuollimat šadde eambbo dábálažžan, maid Lappis. Galhan dat ledje ja máŋgga beaivve oalle oluge, dadjá Hannukari.

Helikopter ráddje máŋgii eanabuollima Sámis

Hannukari čilge, ahte Sámis hástalus ii dávjá leat buollima viidodat, baicce dat, gos buollá. Muhtumin čázige galgá viežžat guhkes mátkki duohken.

– Dohko soaitá leat váttis beassat, guovllus lea váttis johtit, de dieđusge dalle čáskadeapmi váttásmuvvá. Obalohkái dat, ahte beassá báikki ala, váldá áiggi, Hannukari muitala.

Nuba geavahusas leat máŋgii helikopterat, vai dola bastet ráddjet ovdal eatnamis čáskadeami.

– Helikopteriin leat čáskadan ja gádjunhelikopter Aslak lea čáskadan, ja maid rádjegozihanlágádusa fievrrut sierra guovlluin Lappis. Daid mii leat dálge dárbbašan, nugo ovdditge gesiin ja das leamašan stuorra veahkki, lohká Hannukari.

Muđui dán geasi sii eai leat dárbbašan makkárge earenoamáš fievrruid goit doaisttážii helikopteriid lassin.

Anáris ledje geasset 2018 viiddes eanabuollimat, maid čáskadedje máŋga beaivve.

Álo galgá leat várrugas

Hannukari muittuha várrugasvuođas, álo go meahcis cahkkeha dola geassit. Vaikko čavgasamos buollinváruhusaid livččege ložžen, ferte álo luonddus leat várrugas, go sáhka lea dolas.

Maiddái bajándálki dagaha máŋgii eanabuollimiid, dadjá Hannukari.

– Bajándálki lea dakkár, ahte go álddagas časká eatnamii, de sáhttá buollát, son lohká.

Beaivvi ságaid ja Yle Ođđasiid Sámis sáhtát maid guldalit Yle Areenas.