Njuike sisdoaluide

Guldal jiena: Musihkka skádjá Sámi girkobeivviin – sálbmabargobádji čalmmustahttá sámi vuogi lávlut sálmmaid

Girkomusihkkár ja juoigi Johan Máhtte Skum áigu bargobájis čájehit, makkár erohusat leat oarjemáilmmi ja sámi sálmmaid lávlunvugiin ja mo sámi lávlunmálle galgá seailluhit. Musihkka boahtá leat dehálaš oasis Sámi girkobeivviid.

Girkomusihkkár Johan Máhtte Skumii lea dehálaš seailluhit sápmelaččaid iežas vuohki lávlut sálmmaid. Govva: Siv Thompson
Guldal Johan Máhtte Skum jearahallama dás.

Sámi girkobeaivvit čohkkejit fas sápmelaččaid oktii gieđahallat earret eará árgabeaikristtalašvuođa ja olbmo saji sivdnádusa. Dán jagi dat ordnejuvvojit Anáris boahtte vahkuloahpas. Viđat Sámi girkobeivviid temán lea dán vuoro Bassi dolla – Bassi álbmot.

Dán jagi girkobeivviin beassat guorahallat ovdamearkka dihte sámi vuogi lávlut sálmmaid bargobáji olis.

Bargobájis muitaluvvo Norgga girku jagis 2017 álggahan prošeavtta birra, man ulbmilin lea čohkket davvisámegielat sálmmaid korálagirjái nappo čállit sálmmaid nuohtaid.

Dehálaš dan barggus lea seailluhit sámiid iežas vuogi lávlut sálmmaid, muitala girkomusihkkár ja juoigi Johan Máhtte Skum.

– Davvisámegielat sálmmaide eai leat gávdnon korálagirjjit. Girkomusihkkárat leat šaddan atnit daid váras dáru korálagirjjiid, main lea iežá oarjemáilmmi lávlunvuohki vuođđun, čilge Skum.

Sámegielat korálagirjji ráhkadeami váras leat ásahan bargojoavkku, mii lea vuđolaččat bargan heivehit girjji Sámi lávlunmállii heivvolažžan. Johan Máhtte Skum oaidná, ahte dát boahtá leat ávkin girkomusihkkáriidda Davvi-Sámi guovlluin.

– Áiggun dán bargobájis ovdanbuktit prošeavtta bohtosiid ja čájehit daid erohusaid, mat leat oarjemáilmmi lávlunmálles ja mot dat leat leamašan ovddit korálagirjjiin, ja mot mii galgat seailluhit dan sámi lávlunmálle.

– Ja iihan dat šatta sálbmalávlunbargobádji jus ii doppe ii lávllo, de mii beassat lávlut maid. Jus lea boahtime dohko, de ávžžuhan váldit sálbmagirjji mielde, joatká son.

Davvisámegielat sálbmabargobádji lágiduvvo lávvardaga 6.8. diibmu 11 Anára girkus.

Sálbmabargobáji lassin ordnejit olu iešguđetlágan bargobájiid. (siirryt toiseen palveluun)Prográmmas lea earret eará Sunna Nousuniemi bagadan Boso mu ruovttoluotta -filmma geahččan, mánnábearrašiid musihkkaboddu, oahpásmuvvan girkobeivviid čájáhusaide ja maiddái máttasámegielat sálmmaid lávlun.

Musihkas dehálaš rolla girkobeivviin

Sálbmalávluma lassin girkobeivviin gullo maid eará vuoiŋŋalaš musihkka ja luohti. Girkobeivviid lávus ordnejit guokte konseartta, main nubbi lea bearjadaga ja nubbi lávvardaga. Musihkka ja sálbmaárbevierru boahtá leat dehálaš oassi girkobeivviin, mii čatná buot dáhpáhusaid oktii, muitalit girkobeivviid dieđáhusas.

Bearjadaga konsearttas loaiddasteaba Anna Näkkäläjärvi-Länsman ja Raimo Paaso. Čále Jesus iežat gova -konsearttas gullat luđiid ja sálmmaid Näkkäläjärvi-Länsman guoktá seammanammasaš sálbmaskearrus. Konsearta álgá dii 19.00 ja dan lohppii earkebisma Tapio Luoma doaimmaha eahketrohkosa.

Lávvardaga girkobeivviid lávus beassat gullat ođđa nuortalašgielat musihka, go Tero Harju ja Aimo Aikio ovttasbarggus šaddan Čaʹppesrääʹstes-joavku lávke lávddi ala.

Sudno maŋŋá beassá Anna Morottaja livđut árbevirolaš anáraš livđiid girkobeaiálbmogii.

Eahkeda goalmmát artista lea dán jagáš Sámi Grand Prix -lávlunoasi vuoiti Ingá-Máret Gaup-Juuso. Son loaiddasta Tundra Electro -joavkkuinis, mii ovttastahttá juoiganárbevieru modearna elektronalaš musihkain. Lávvardaga konsearta álgá diibmu 19.00.

Beaivvi ságaid ja Yle Ođđasiid Sámis sáhtát maid guldalit Yle Areenas.