Njuike sisdoaluide

Geahča video: Lávut ceagganit jo Sajosa šilljui Anáris – viđát Sámi girkobeaivvit šaddet dán vahkkoloahpa

Girku sámebarggu čálli Erva Niittyvuopio sávvá, ahte girkobeivviid šaddet šiega dálkkit ja ahte lágideapmi manná bures.

Erva Niittyvuopio valmistelemassa kirkkopäiviä Inarissa.
Erva Niittyvuopio lea ieš maid báikki alde čuovvumin lávuid ceggema.

Mašiinnat gevvet, go bargit ceggejit girkobeailávuid Sajosa šilljui Anárii. Viđát Sámi girkobeaivvit šaddet Anáris dán vahkkoloahpa, borgemánu 5.–7. beivviid.

– Orrot leamen jo viehka máŋga lávu ceaggut, muitala girku sámebarggu čálli Erva Niittyvuopio.

Son vuordá jo girkobeivviid álgima ja čujuha dán jagáš fáddái, mii lea Bassi dolla – Bassi álbmot.

– Bassi álbmot beassá bassi dola gurrii čohkohallat, dat lea hui dehálaš. Dál orru hui speanta, girkobeaivvit leat farga álgimin dáid beivviid, Niittyvuopio lohká.

Suorra lávvui šihttet sullii 500 olbmo. Govva: Marianne Ketola / Yle

Niittyvuopio illuda, go olbmot besset čoahkkanit girkobeivviide. Sutnje dehálaš lea beassat deaivvadit ja háleštit olbmuiguin.

– Virggálaš prográmma álgá bearjadaga diibmu 10.30. Dalle fidne girkobeivviid boradantealttás oastit borramuša, son dadjá.

Niittyvuopio sávvá, ahte girkobeivviid šaddet šiega dálkkit ja ahte lágideapmi manná bures.

– Gal mun vuorddán maiddái dan, ahte olbmot besset návddašit ja leat ovttas, ságastallat ja guldalit nuppiideaset, son dadjá.

Girkobeivviid prográmmas váldet vuhtii nu rávesolbmuid go nuorabuidge

Girkobeaivvit čohkkejit oktii máŋgga buolvva sámiid lávlut árbevirolaš sálmmaid, searvat ipmilbálvalusaide ja čuovvut semináraid. Girkobeivviid stuorra lávus lágidit golbma iešguđet seminára.

Dasa lassin nuoraide leat dán jagi sierra prográmma, earret eará tuvra Bielbajávrri girkui, olgostohkosat, nuoraidmeassu bargobádji, filmmat ja ságastallandilálašvuohta.

Sámi girkobeivviid lágidit Suoma evangelalaš-luteralaš girku sámebarggu ráđđádallangoddi, Sámi girkoráđit Norgga ja Ruoŧa girkus, Oulu bismagoddi, Anára searvegoddi ja Oulu ortodoksalaš bismagoddi.

Sámi girkobeivviid lágidit Anáris 5.–7.8.2022. Girkobeivviid prográmma gávnnat Suoma evangelalaš-luteralaš girku neahttasiiddus (siirryt toiseen palveluun). Girkobeivviid prográmmii oassálastin lea nuvttá, iige dáhpáhussii dárbbaš sierra almmuhit.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat