Njuike sisdoaluide

Almmolašvuođas leat njeallje evttohasnama ođđa komissáran – ođđa evttohas lea Juha Lassila

Yle Sápmi jearai sámediggeáirasiin, geat leat dál evttohassan ođđa komissáran sámiid duohtavuođa- ja soabadankomišuvdnii ja geaid sii dorjot.

Juha Lassila lea anáraš teologa ja báhppa, Anne Nuorgam jurista ja sámediggelahttu, Heikki Paltto boazodoalli, fitnodatdoalli ja Sámedikki válgalávdegotti ságadoalli ja Juha Joona lea riektediehtaga doavttir. Govva: Vesa Toppari / Yle

Dálá dieđuid mielde sámiid duohtavuođa- ja soabadankomišuvdnii leat njeallje komissáraevttohasa: Juha Joona, Juha Lassila, Anne Nuorgam, ja Heikki Paltto.

Sámediggi lágida badjelmearálaš dievasčoahkkima boahtte vahku maŋŋebárgga komissáraid válljema várás earránan komissáraid sadjái.

Yle Sápmi gažadii evttohasaid birra sámediggeáirasiin.

Evttohassan báhppa, jurista ja badjeolmmoš

Komissáraevttohas Juha Lassila lea anáraš teologa ja báhppa. Son lea riegádan ja šaddan Mátta-Suomas. Lassila muitala, ahte su leat evttohan komissáran, ja son lea dasa maiddái gearggus.

– Komišuvnna bargu lea dehálaš ja iešalddes lei vehá vuordemeahttun, ahte mu bivde dán bargui, Lassila dadjá.

Juha Lassila oaidná ieš, ahte su gáiddusvuohta lea ávkin komissára barggus.

– Iežan mielas lean doarvái guhkkin eret áigeguovdilis hušas, mii geavvá dál servoša siste. Dihtolágan sorjjasmeahttunvuohta gullá komissára bargui, son lohká.

– Mus lea doarvái vásáhus sápmelašvuođas ja nuppe dáfus doarvái gaska sámeservoša árgabeaivái, nu ahte munnje lea álkit oaidnit ollislašvuođa ja dan láhkai bargat áššedovdin guovdu dáid gažaldagaid, Lassila čilge.

Lassila gullá anáraš sohkii Njellim guovllus. Lassila lea lohkan anárašgiela Sámi oahpahusguovddážis.

– Mu giellamáhttu ii leat vuos doarvái buorre, muhto hálidivččen ovddidit dan, son muitala.

Juha Lassila oaidná ieš, ahte su gáiddusvuohta lea ávkin komissára barggus. Doaimmaheaddji Mira Rauhala jearahallá.

Jurista Anne Nuorgam sihke badjeolmmoš ja fitnodatdoalli Heikki Paltto muitaleigga juo árat dán gease, ahte leaba miehtan komissáraevttohassan. Sámedikki áirras ja stivralahttu Anne Nuorgam muitalii, ahte jus son válljejuvvo komissáran, de son guođášii Sámedikki stivralahttuvuođa, muhto joatkkášii sámediggeáirrasin.

Anne Nuorgam muitalii geassemánus Yle Sámi jearahallamis, manin lea miehtan evttohassan komissáran. Son oaidná dehálažžan komišuvnna barggu ja luohttámuša huksema sámeservodahkii. Doaimmaheaddji Inger-Elle Suoninen jearahalai.

Heikki Paltto fas lea ovddeš Sámedikki áirras ja dálá Sámedikki válgalávdegotti ságadoalli. Paltto muitalii, ahte jus son válljejuvvo komissáran, de son heaitá válgalávdegotti ságadoallin.

Heikki Paltto nannii Yle Sápmái suoidnemánu álggus, ahte maiddái son lea miehtan álgit komissáraevttohassan sámiid duohtavuođa- ja soabadankomišuvdnii. Son atná dehálažžan, ahte soabadanproseassa joatkašuvvá, go dan livččii váttis fidnet johtui nuppi háve. Doaimmaheaddjin áššis Mira Rauhala.

Ovddit evttohasain okta lea beroštuvvan evttohasvuođas

Yle Sápmi jearai maiddái ovddit komissáraevttohasain, leatgo sii ain das mielde. Gažadeamis bođii ovdan, ahte Sámedikkis eai leat leamašan oktavuođas ovddit evttohasaide.

Ovddit válljenproseassa evttohasain riektadiehtaga doavttir Juha Joona lohká, ahte son livččii beroštuvvan komissáraevttohasvuođas.

Petteri Länsman fas muitala, ahte sus ii leat diehtu das, leatgo su evttohan komissáran. Yrjö Musta ja Aslak Pieski muitaleaba, ahte soai eaba leat dán vuoro evttohassan danin, go oktage ii leat sudno dohko evttohan. Marjaana Aikio, Nils-Henrik Valkeapää ja Irja Seurujärvi-Kari eai loga leat šat komissáraevttohasat.

Gean sámediggeáirasat dorjot?

Yle Sápmi jearahii sámediggeáirasiin maiddái dan, gean sii dorjot komissáran.

Sámediggeáirasiin goit Inka Kangasniemi ja Anu Avaskari doarjuba Juha Lassila komissáraevttohasvuođa.

– Mu evttohas lea Juha Lassila, guhte lea anáraš báhppa ja su sohka lea Njellimis eret. Dákkár duohtavuohta- ja soabadanproseassa komissára ferte boahtit politihka olggobealde, ja dehálaččat leat maid sorjjasmeahttunvuohta ja sápmelašvuohta sihke dat, ahte dovdá kultuvrra ja lea luohttámus, ákkastallá Kangasniemi.

Maiddái Avaskari mielas Juha Lassila livčče buorre komissára.

– Lassila lea doarvái olggobealde, muhto dovdá goittot kultuvrra ja lea sápmelaš, ákkastallá fas Avaskari iežas válljema.

Pirita Näkkäläjärvi fas doarju Anne Nuorgama válljema komissáran, go son lea Näkkäläjärvi mielas sámeservodaga nana áššedovdi. Anárašgiel komissára válljemii son ii váldde beali.

– Sámediggi galgá guldalit sámi álbmoga máhcahaga, ja oahppat das mii lea dáhpáhuvvan, ja válljet dál komissáran guokte servodatáššiin hui, hui vásihan ja hárjánan sápmelačča, ákkastallá Näkkäläjärvi.

Kari Kyrö doarju fas Juha Joona komissáran. Kyrö mielas Joona lea buoremus evttohas komissára bargui.

– Sus lea vásáhus barggu gáibideaddji iešvuođain, son lea ráfálaš ja sus lea viiddes luohttámuš anáraččaid ja earáge sámiid gaskkas, ákkastallá Kyrö.

Leo Aikio, Veikko Feodoroff, Tauno Ljetoff ja Irja Seurujärvi-Kari eai leat vel válljen, geaid dorjot ođđa komissáran. Juha-Petteri Alakorva ii doarjjo geange, go lea sávvan, ahte ášši máhcahuvvošii ođđasit válmmaštallamii.

Veikko Porsanger ja Jouni Äärelä almmuheigga, ahte eaba leat áigumin oassálastit boahtte vahku badjelmearálaš čoahkkimii.

Eará áirasiid eat leat fáhten gaskavahku áigge gažadeami várás.

Sámediggi vállje boahtte vahkus guokte komissára

Sámediggi ordne badjelmearálaš dievasčoahkkima gáiddusin maŋŋebárgga borgemánu 9. beaivve diibmu 9–16 duohtavuođa- ja soabadankommišuvnna ođđa komissáraid válljema várás. Čoahkkima ulbmilin lea nammadit guokte ođđa komissára, geain nubbi ovddasta anárašgiela giellajoavkku ja nubbi fas davvisámegiela giellajoavkku.

Sámediggi lea maid bivdán váldit oktavuođa Sámedikki áirasiidda dahje ságajođiheaddjiide, jus sis leat evttohusat komissáraevttohassan.

Beaivvi ságaid ja Yle Ođđasiid Sámis sáhtát maid guldalit Yle Areenas.

Beaividuvvon 4.8.2022 diibmu 11.15: lasihuvvon Kari Kyrö oaivil ja kommeanta.

Beaividuvvon 4.8.2022 diibmu 15.34: Kyrö kommeantta vuođul Joona lea dál maid rehkenaston evttohassan.

Ođđasamosat