Njuike sisdoaluide

Kuldâl jienâ: Säminuorâi taaiđâtábáhtus taan ive teema lii muusik já tiivtah – almotâttâm tábáhtusân lii áávus

Säminuorâi taaiđâtábáhtus uárnejuvvoo 14.–15.9.2022 Anarist.

Säminuorâi taaiđâtábáhtusâst párnááh já nuorah peessih oppeet čokkâniđ. Govva: Kirsti Länsman / Yle

Taan ive Säminuorâi taaiđâtábáhtus teeman lii muusik já tiivtah. Kuohtuid teemaid puáhtá uásálistiđ láávdástmáin teikkâ vuolgâtmáin jieš rahtum muusikpitá tâi tiivtâ.

Uárnejeijee Anni-Sofia Niittyvupio muštâl, ete muusikpitá teikkâ tiivtâ páuhtá vuolgâttiđ ovdâmerkkân jis ij haalijd oovdânpyehtiđ tom lyeve alne.

– Kirjálijn tuojijn mip árvuštâllâp kielâ, stijlâ já hutkâđvuotâ. Muusikpitáin mij árvuštâllâp siämmáid aašijd sehe maht oovdânpyehtim lii puohtum oohtân, Niittyvuopio čielgee.

Tábáhtusân puáhtá almotâttâđ 1.8.–26.8.2022 liiŋkâ peht mii kávnoo Sämitige nettisijđoost. (siirryt toiseen palveluun) Puohah, kiäh äiguh uásálistiđ, ferttejeh almotâttâđ veikkâ iä uásálist lávdástmân já kirjálijd tuojijd.

Táválávt Säminuorâi taaiđâtábáhtus lii uárnejum kiđđuv. Niittyvuopio muštâl, ete vala kiđđuv korona tile ij lamaš nuuvt čielgâs, te sij meridii orniđ tábáhtus eskin čohčuv. Návt sij halijdii visásmittiđ, ete tábáhtus lii torvolâš já sij pyehtih tuođâi čokkâniđ, ige tábáhtus taarbâš orniđ káidusin.

– Mij tieđijm, ete nuorah já párnááh lijjii hirmâd pettâšum ko iä peessâm moonnâm ive čokkâniđ oohtân, Niittyvuopio muštâl.

Vala taan ive Säminuorâi taaiđâtábáhtus uárnejuvvoo čohčuv 14.–15.9.2022 Anarist.

Puátteevuođâst ličij tuoivân, ete taaiđâtábáhtus puávtáččii maccâđ jotteem stijlân, kost tábáhtus orniiččij ain jieškote-uv paaihijn sämikuávlust.

Anni-Sofia Niittyvuopio muštâl taan ive Säminuorâi taaiđâtábáhtusâst. Toimâtteijen Susanna Guttorm

Ođđasamosat