Njuike sisdoaluide

Hannu Antti Magga čájáhusas beassá oahpásmuvvat lagabui 300 jagi boares boazomearkkaide

Eanodatlaš Hannu Antti Magga boazomearkačájáhus lea oaidnin láhkai Anára sámegirjerádjosis Sajosis 3.–7.8.2022.

Eanodatlaš Ovllá-Hánno čájáhusas leat oaidnin láhkai lagabui 500 beassis čuhppon boazomearkka. Govva: Jouni Aikio / Yle

Dán vahkus lea vejolaš oaidnit Anára sámegirjerádjosis Sajosis boazomearkačájáhusa. Eanodatlaš Ovllá-Hánno, Hannu Antti Magga čájáhusas leat oaidnin láhkai lagabui 500 beassis čuhppon boazomearkka, mat gullet seamma mearkaoallái.

Magga lea dutkan sápmelaš boazomearkkaid guhká ja lea bajásšaddan iežas dutkanfáddái jo mánnávuođa rájes sámi boazobearrašis.

Magga čájáhusa vuođđun lea okta mearkaoalli: olgeš beallji guobir, gurut geaigut ja muhtimiin gurut bealjis luddestat. Magga dutkamušaid mielde dát mearkaoalli lea Andersson-soga viidásamos.

Čájáhusa lulimus mearka lea Mátta-Sámis Idres ja davimus mearkkat fas gullet Ohcejoga Guttormaide ja Beahcáma nuortalaččaide. Boarráseamos mearkkat leat 1740-logus.

Buot čájáhusa mearkkat leat čuhppojuvvon beassis, mii lea boares sámi vuohki oahppat dovdat mearkkaid ja čájehit daid.  Govva: Jouni Aikio / Yle

Guorran mearkkaid sohkagirjjiid vehkiin

Magga lea bargan čájáhusáinnis máŋggaid jagiid. Son lea guorran sihke mearkkaid ja sogaid maiddái iešguđet sohkagirjjiid vehkiin sihke Norggas, Ruoŧas ja Suomas.

Magga muitala, ahte guokte seammalágan mearkka eai gávdno. Don doložis boazomearka lea sámi boazodoalus leamašan soga oamastusas. Dávjá olmmoš árbe mearkka iežas vánhemis, áhkus dahje ádjás dahje vádjolan fuolkkis. Mearkka sáhttá árbet juobe máŋggaid buolvvaid duohken.

Hannu Antti Magga leage fuolas das, ahte dán áigge mearkkat sirdásit vierrásiid háldui ja dáid gávppašit viidáset eret boazosámisogain.

– Dat lea stuorra dáhpa ja áitta sápmelaš boazodollui, dadjá Magga.

Hannu Antti Magga boazomearkabarggu ja -čájáhusa leat dorjon Suoma kulturruhtarádju, Svenska kulturfonden, Majaoja-vuođđudus, Niilo Helandera vuođđudus ja Suoma Sámediggi.

Eanodatlaš Hannu Antti Magga lea bargan boazomearkačájáhusáinnis máŋggaid jagiid. Son lea guorran mearkkaid maiddái iešguđet sohkagirjjiid vehkiin sihke Norggas, Ruoŧas ja Suomas. Doaimmaheaddjin lea Jovnna Aikio.

Beaivvi ságaid ja Yle Ođđasiid Sámis sáhtát maid guldalit Yle Areenas.