Njuike sisdoaluide

Keejâ vuolgâttâs: Häävdist tolvum sämiuámikkâsah hävdiduvvojeh maassâd Anarist

Yle vuolgât puoh kulmâ hävdidemtilálâšvuođâ njuolgâ vuolgâttâssân neetist. Pasepeeivi Aanaar Jaamišsuollui hävdideh 69 sämiuámikkâs.

Inarin Vanhahautuumaasaari
Njuolgâ vuolgâttâs álgá pasepeeivi tijme 17.50.

Onne pasepeeivi häävdist tolvum 69 sämiuámikkâs peesih sivnedum enâmân Jaamišsuollui. Yle vuolgât tilálâšvuođâst njuolgâ vuolgâttâs Yle Areenast tijme 17.50

1800- já 1900-lovoi kooskâst já nube maailmsuáđi räi syemmiliih já olgoeennâmliih totkeeh koivuu sämiuámikkâsâid häävdist nälibiologisij tutkâmušâi tiet.

Tääl sämiuámikkâsah mäccih havdijd Aanaar Jaamišsuollui, Ucjuuvâ Pase Ulriikka hävdienâmân sehe Njellim ortodoksilâš hävdienâmân, pasepeeivi já vuossaargâ uárnejum tilálâšvuođâin.

Yle čuávu puoh tilálâšvuođâid njuolgâ vuolgâttâssân Yle Areenast. Vuolgâttâs lii sämi- já suomâkielâlâš.

Sämiuámikkâsâid láá kuáivám Jaamišsuollust joba kuohtii

Aanaar Jaamišsuollust uámikkâsâid láá káivum kyevti sierâ tove. Vuossâmuu tove ive 1878 ruuki-insiner C. P. Solitander kuáivui hävdienâmist ohtsis 103 sämmilii uáiviskáálžu.

Museotiäđui mield Solitanderist ij lamaš kuáivumân lope, ko Aanaar servikode jesâneh vaidii kuáivumist ruvnâvoutin. Vouti almottii ääšist Oulu lääni eennâmhiärán, mut uáiviskáálžuh iä macâttum Anarân.

Čuávuváá tove Jaamišsuollust ljjii kuávumeh ive 1934. Antropologisâš toimâkode mätkikodde leehâi 69 hävdid, taan tove uáiviskáálžui lasseen haavdijn valdii meiddei uámikkâsâi eres-uv taavtijd.

Taan mätkikode kuáivum 69 uámikkâssâd macâttuvvojeh pasepeeivi.

Vuossaargâ 8. porgemáánu uđđâsist hävdidmeh juátkojeh UcjuuvâstNjellimist. Ucjuuvâ Pase Ulriika hävdienânâm hävdideh 68 uámikkâs já Njellim ortodoksilâš hävdienâmân kulmâ nuorttâlâšuámikkâs.