Njuike sisdoaluide

Geahča video: Hávddiin roggojuvvon oaiveskálžžut gokčojuvvojedje eatnamii Ohcejogas

Yle sáddii njuolggosáddaga dilálašvuođa Yle Areenas. Vuossárgga Ohcejoga Bassi Ulriika girku hávdeeatnamii gokčojuvvojedje 68 sápmelačča oaiveskálžžu. Yle Areenas sáddaga láidestii Jouni Aikio.

Saamelainen hautajaissaatto Utsjoella. Rotututkimuksiin kaivetut vainajat pääsivät takaisin kirkkomaahan.
Sámeguovllu hávdeeatnamiin roggojuvvon váinnit gokčojuvvojedje eatnamii ođđasit Anáris ja Ohcejogas. Váinnit leat juo sivdniduvvon dolin, ja doaimmahusain geavahedje dál girkolaš eatnamii čiehkama láva.

Eatnamis roggojuvvon 68 sápmelaš máddariid oaiveskálžžut máhcahuvvojedje bassi eatnamii otne vuossárgga. Yle sáddii njuolggosáddaga Yle Areenas diibmu 9.50 rájes.

1800-logu ja 1900-logu doajáldagas gitta nuppi máilmmisoađi rádjái suopmelaš ja olgoriikalaš dutkit rogge sápmelaš máddariid dávttiid hávddiin nállebiologalaš dutkamušaid várás. Dál sápmelaš máddariid dávttit luitojuvvojedje ruovttoluotta hávddi ráffái.

Álbmot beasai čuovvut Ohcejoga hávdádandilálašvuođa. Govva: Kirsti Länsman / Yle

Eurohpá dutkit beroštedje ollu sápmelaččaid oaiveskálžžuin

Bassi Ulriika girku hávdeeatnama geavahanhistorjá olaha 1700-logus gitta 1930-lohkui. Jagiin 1882–1883 Gihttela biiredoavttir A. E. Jansson rokkai hávdeeatnamis 94 sápmelačča oaiveskálžžu.

Otne vuossárgga Ohcejohkii máhcahuvvojedje 68 oaiveskálžžu.

Gistu lea duddjojuvvon Muttošjávrri bálgosa boazoáiddi fielluin. Govva: Kirsti Länsman / Yle

Museadieđuid mielde sivvan lohkui lea dat lea, ahte sámeváinniid oaiveskálžžut ledje háliiduvvon ja divrras gávpegálvvut eurohpálaš dutkiid gaskkas ja oassi máddariid dávttiin leat báhcán dutkanásahusaid háldui.

Ohcejoga guovllus leat roggan oaiveskálžžuid maiddái Nuvvosa, Dálvadasa ja Áibmejoga guovllus Jámežiid guolbanis. Dáin guovlluin dávttiid leat roggan norgalaš dutkit.

Vuossárgga borgemánu 8. beaivvi bázahusaid eatnamii gokčandáhpáhusat joatkašuvvet velá eahketbeaivve Njellima ortodoksalaš hávdeeatnamis. Doppe eatnamii čihket golmma nuortasápmelačča bázahusaid.

Dilálašvuohta Nellimis álgá diibmu 15.