Njuike sisdoaluide

Sámi girkobeivviide bohte guossit gitta Tanzanias – maasai bismá oaidná ollu ovttaláganvuođaid sámiid ja maasai álbmoga gaskkas

Maasai bismá Jacob Mameo Moreto vulggii Sámi girkobeivviide oahppat sámiid birra.

Tanzanialaš maasai bismá Jacob Mameo Moreto lei dál jo nuppi háve Anáris. Govva: Sáárákáisá Seurujärvi / Yle
Guldal maasai bismá Jacob Mameo jearahallama dás. Ášši doaimmahii Sáárákáisá Seurujärvi ja sámás logai Mira Rauhala.

Maasai bismá Jacob Mameo Moreto oassálasttii mannan vahkkoloahpa Sámi girkobeivviide. Dát lei su nubbi galledeapmi Anáris.

Son lea ieš eret Morogoro gávpogis Tanzanias. Buot eanemus son vurddii dan, ahte beasašii oahppat sámiid birra.

Mameo Moreto finai oahpásmuvvamin sámiide maiddái Sámi musea Siiddas. Doppe son gávnnahii, ahte sámiid ja maasai álbmoga gaskkas leat ollu ovttaláganvuođat. Son máinnaša earret eará šibitdoalu ja biktasiid ivnni.

– Maiddái mis leat šibihat, ja mii maiddái geavahat rukses biktasiid, Mameo Moreto dadjá.

Maasait guođohit gáiccaid, sávzzaid ja gusaid. Eanadoallu ii goittotge gula sin kultuvrii.

– Mis lea dušše šibitdoallu, dat lea min láibi, son lohká.

Maasait orrot Nuorta-Afrihkás Kenia ja Tanzania riikkain (siirryt toiseen palveluun). Árbevirolaččat maasait leat johtti eamiálbmot, muhto dálá áigge earret eará eatnamiid gáržun áitá árbevirolaš eallinvuogi.

Eamiálbmotvehádat eanetlogu álbmogiid siste

Ovttaláganvuođain maasai bismá Jacob Mameo Moreto buktá ovdan maiddái dan, ahte guktot álbmogat leat vehádagat eanetlogu álbmogiid siste.

– Maiddái maasai álbmot ferte dáistalit rivttiin ja eatnamiin stáhta vuostá.

Mameo Moreto oaidná sámiid eallinvuogi modearnabun ja addá das ovdamearkkaid.

– Sámiin leat sámeradio, musea ja sámit sáhttet maid bargat stáhtas. Maasain ii leat nie, son čilge.

Su mielas álbmoga iežas media lea mávssolaš, go dan bokte sáhttá vuiget áššiid, jus almmolašvuođas boahtá boastto diehtu ovdan.

Oskku birra Mameo Moreto muitala, ahte maasai álbmogis gávdnojit iešguđetlágan oskkoldagat.

– Muhtimat eai gula girkui, ja sii oskot dološ ipmiliidda ja muhtimat fas iešguđet girkosurggiide, son dadjá.

Beaivvi ságaid ja Yle Ođđasiid Sámis sáhtát maid guldalit Yle Areenas.