Njuike sisdoaluide

Sámit čoahkkanit 22. konferánsii Váhčirii – "Gal dat lea juo áigi", illuda Sámiráđi várrepresideanta

Sámiráđi várrepresideanta Aslak Holmberg atná váidalahttin, ahte Ruošša beale sámit eai beasa virggálaččat oassálastit sáttagottiideaset bokte dán sámekonferánsii.

Sámiráđi várrepresideanta ja Suoma juhkosa ságadoalli Aslak Holmberg illuda searvat sámekonferánsii. Govva: Kirsti Länsman / Yle

Sámiid 22. konferánsa lágiduvvo dán vahkus Váhčiris Ruoŧa bealde. Árbevirolaččat sámekonferánssaid leat doallan njealji jagi gaskkaid, muhto pandemiija geažil lágideami leat šaddan maŋidit máŋgii.

Sámiráđi várrepresideanta ja Suoma juhkosa ságadoalli Aslak Holmberg illuda, go sámit dál besset gávnnadit guhkes bottu maŋŋá.

– Gal dat lea juo áigi. Dat lea hui somá viimmat beassat čoahkkanit ja čađahit dan, mii lea Sámi siviilaservodaga stuorámus dáhpáhus. Gal mii leat juo vuordán dan, dadjá Holmberg.

Sámekonferánsii ja siidodáhpáhusaide vurdet searvat dán jagi máŋggaid čuđiid sápmelaččaid. Joavkkus goit váilot Ruošša beale sámit, ja dan Holmberg atná morašlaš áššin.

– Dat lea vuosttaš háve dan rájes go Sovjetlihttu gahčai, ahte mis eai leat Ruošša beale verddet oassálastime goit virggálaččat sáttagottiideaset bokte konferánsii. Dat lea oalle váivi, go diet lea okta vuođđojurdda Sámiráđis, ahte mii leat okta álbmot njealji riikkas, dadjá Holmberg.

Sámi fámuidahttin oktan fáddán

Sámiid 22. konferánssa oktavuođas lágiduvvo olu máŋggalágan prográmma (siirryt toiseen palveluun), nu seminárat go maiddái konsearttat.

Gaskavahku ja duorastaga Sámiráđđi ordne KulturSápmi-dáhpáhusa (siirryt toiseen palveluun), mii lea deaivvadanbáiki kultursuorggi doaibmiide ja olbmuide. Lassin lágiduvvo maiddái kursa EU ja Sámi gaskavuođaid birra (siirryt toiseen palveluun).

Ieš sámekonferánsa beassá suokkardallat seminárain dálkkádatrievdama ja maiddái Sámi fámuidahttima. Holmberg muitala, ahte Sámi fámuidahttin lea hui viiddis fáddá.

– Mii lahkonit dan ášši iešguđet geahččanguovlluin. Das lea ulbmil buktit ovdan dan, ahte makkár iešguđet vugiiguin mii sáhttit fámuidahttit Sámi. Mii buktit dohko sihke kultuvrralaš geahčastaga, vehá guoskkahit dutkanmáilmmi ja buktit dohko máŋggaid iešguđet surggiid olbmuid ja vehá viggat maid suohtas geahččanguovllus dan vuolggahit, čilge Holmberg.

Holmberg mielas okta deháleamos áššiin lea dat, ahte maid sámekonferánsa cealká julggaštusastis.

– Gal dat orru juo hui guhkes áigi das mannan, ahte beassat gávnnadit ja hállat oktasaš áššiin ja smiehttat, ahte makkár luottaid mii válljet ovddos guvlui ja makkár bealiváldima konferánsa buktá ovdan, dadjá Aslak Holmberg.

Sámiráđđi lea sápmelaččaid oktasaš sorjjasmeahttun kulturpolitihkalaš ja politihkalaš ásahus, mii doaibmá Norgga, Ruoŧa, Ruošša ja Suoma sámiid organisašuvnnaid oktasašbargoorgánan.

Sámiráđi doaibma vuođđoduvvá sámiid konferánssain dahkkojuvvon mearrádusaide, ja doppe dahkkon ja mearriduvvon ovdanbuktimiidda, julggaštusaide ja politihkalaš prográmmaide.

Sámiráđi várrepresideanta ja Suoma juhkosa ságadoalli Aslak Holmberg illuda, go sámit dál besset gávnnadit guhkes bottu maŋŋá. Doaimmaheaddjin lea Anni-Saara Paltto.

Beaivvi ságaid ja Yle Ođđasiid Sámis sáhtát maid guldalit Yle Areenas.