Njuike sisdoaluide

Sámiid dovdomearka ČSV deavdá 50 jagi – Sirpmás lágidit dan gudnin ávvudoaluid lávvordaga

Vuosttaš sámiid girjjálašvuođa čoahkkin dollojuvvui Sirpmás čakčamanus 1972. Dalle almmustahttui sámi lihkadusa symbola ČSV. Dál das lea 50 jagi áigi.

Govas čuojahit Deatnogátte gánddat Hartvig Hansen, Ingvald Guttorm, Leif Wigelius ja Jan Henriksen. Paulus Utsi lea báddemin. Joavku rievdadii nama Deatnogátte Nuoraide maŋŋá go Irene Pettersen searvvai mielde. Govva lea váldon jagis 1972 vuosttaš sámi girjjálašvuođasemináras Sirpmás. Govva: Odd Mathis Hætta

Deatnogátte Sámi Searvi ordne lávvordaga 13.8. Sirpmá gilivisttis ČSV 50 jagi ávvudoaluid. ČSV-symbola almmustahttimis lea gollan 50 jagi ja Sirbmái vurdet ollu gussiid muittašit, ságastallat ja ávvudit sámegiela ja kultuvrra dovdomearkka.

Dáhpáhus sisdoallá earet eará čájáhusa, seminára ja konseartta. Prográmma álgá diibmu 12 ja bistá gitta eahkedii. Buohkat leat buresboahtin.

Golbmabustávat dovdomearka ČSV, Čájet Sámi Vuoiŋŋa, almmustuvai Sirpmás čakčamanus 1972, go sámit čoahkkanedje vuosttamuš sámiid girjjálašvuođa čoahkkimii, muitala okta dáhpáhusa lágideddjiin Máret Guhttor.

– Dalle čoahkkanedje moaddelogi olbmo, čállit, diktačállit ja nuorra olbmot Kárášjoga joatkkaskuvllas, ja almmuhedje ČSV.

Jagi ovdal sámiid vuosttaš girjjálašvuođa čoahkkima sápmelaččat čoahkkanedje studeantačoahkkinseminárii.

– Doppe jo gullostii ČSV, muitala Guhttor.

Studeantaseminárii oassálastán sámit oaivvildedje, ahte dál ferte sámegiela, sámevuođa ja sámebarggu nannet eanet. Dan dihtii sámekultuvrra lávdegoddi, mii gulai Norgga kulturráđi vuollái, lágidii vuosttaš sámiid girjjálašvuođa seminára 1972.

– Dat galggai buktit sápmelaččaide searaid ja movttiidahttit sápmelaččaid bargat eambbo sámegielain ja buot dakkár áššiiguin, mat gusket sámevuhtii, muitala Guhttor.

Sámelihkadus lei vuolgán johtui moadde jagi árat. Sámenuorat álge juoigat, geavahit čuojanasaid juoigamii ja lávlut sámegillii.

ČSV-áigge dovddus artisttat máhccet ávvudit jorba jagiid

Máret Guhttor muitala, ahte sii leat bovden ávvudoaluide daid olbmuid, geat ledje mielde sámiid girjjálašvuođa semináras 1972.

– Guđas sis bohtet deike Sirbmái lávvordaga, vuordá Guhttor.

Dii 19 álgá ČSV ávvukonsearta, gos deivet earet eará Ann Jorid Henriksen, Ammun Johnskareng, Deatnogátte Nuorat -joavkku lahttu Irene Pettersen, Niillas Holmberg, Åsa Márgget Anti, Ellinor Skartland, Juhán Niillas Wigelius ja Laura Tapiola.

Konsearttas leat ČSV -áiggi dovddus ja bivnnut artisttaid lassin maiddái otná nuorra artisttaid.

– Nuorathan galget dán doalvut viidásabbo boahtteáigái, oaivvilda Guhttor.

Eahket joatkašuvvá Sámefeasttain, gos lea rabas mikrofuvdna ja sámemusihkka.

Eambbo doaluid prográmma birra sáhtát lohkat Deanu- ja Deatnogátte Sámiid servviid Facebook-siiddus. (siirryt toiseen palveluun)

Máret Guhttor muitala Sirpmá ávvudoaluid birra ja mo ČSV šattai 50 jagi dassái. Doaimmaheaddjin Ida Grønmo.

Beaivvi ságaid ja Yle Ođđasiid Sámis sáhtát maid guldalit Yle Areenas.