Njuike sisdoaluide

Siidsååbbar haaʹlad õinn juäʹtǩǩed tuõttvuõtt- da suåvâdvuõttkomissio tuâj: “Sääʹmteʹǧǧ ij vueiʹt årstâʹtted tuâj õhttu”

Sääʹmsuåvtõõzzi miõlâst komissiotuâj õõlǥči õinn juäʹtǩǩed kuullâmpooddivuiʹm. Saaʹmi siidsåbbar vaʹlljeem komissaar Irja Jefremoff vuäinn ääʹšš seämmanalla.

Saaʹmi ouddooumaž Veikko Feodoroff mieʹldd saaʹmi suåvtõõzzâst lij täätt juäʹtǩǩed ouddmiârkkân nuõrttsäʹmmlai jiijjâz kuullâmpooddivuiʹm. Govva: Ville-Riiko Fofonoff / Yle

Sääʹmteʹǧǧ mieʹrrii jiõnstummuž mâŋŋa väʹldded kõõut säʹmmlai tuõttvuõtt- da suåvâdvuõttkomissio tuâjast mââibaarǥ såbbrest.

Komissio valmštõõllmest leʹjje aalǥ rääʹjest mieʹldd še Saaʹmi siidsååbbar di Lääʹddjânnam valdia. Sääʹmsuåvtõõzz såbbrõʹšše seäradjeäʹǩǩää da leʹjje tõn miõl, što Sääʹmteʹǧǧ ij vueiʹt pâi õhttu tuʹmmjed obb komissio tuâj kõʹhtte piijjmõõžžâst.

Sääʹmsuåvtõõzz haaʹlee juäʹtǩǩed komissio tuâj, särnn saaʹmi ouddooumaž Veikko Feodoroff.

– Siidsååbbar iʹlla välddam kõõut, što mij leäʹp čõnnõõttâm seämmanalla, ko leäʹp tän räjja leämmaž, särnn Feodoroff.

Saaʹmi ouddooumaž Veikko Feodoroff mušttal Sääʹmsuåvtõõzzi såbbrest, kååʹtt leäi seärad.

Saaʹmi ouddooumaž Veikko Feodoroff lij še Sääʹmteeʹǧǧ vuäzzlaž da jiõnsti Sääʹmteeʹǧǧ såbbrest kõõut välddmõõžž vuâstta.

Feodoroff vuäinn, što Saaʹmi siidsåbbrest lij smiõttmõõžž päiʹǩǩ ââʹn, ko Sääʹmteʹǧǧ ij såbbreʹstes vaʹlljääm jiijjâs komissaarid.

– Mij haaʹleep, što mij saaʹmi aaʹššid äʹlǧǧe seʹlvvted tän kõõut ääiʹj, što teäddceäkldõs leʹčči mij nuõrttsäʹmmlai aaʹšši seʹlvvtummšest, mušttal Feodoroff.

Komissaar Jefremoff: “Kuullâmpooddid feʹrttjeʹči altteed veâl, ko puärrsab puõlvvõõǥǥ jeäʹlle”

Sääʹmsuåvtõõzz lie mainstam ääʹššest juʹn Saaʹmi siidsåbbar nõõmtem komissaarin Irja Jefremooffin da sij vuäiʹnne õõutsââʹjest, što nuõrttsäʹmmlai historia šõddmõõžžin vuäitči juäʹtǩǩed kõõut poodd.

Jefremoff jiõčč maantõõđi Sääʹmteeʹǧǧ tuʹmmstõõǥǥ diõtt. Suu mieʹldd obb tuâjj-joukk leäi vueʹrddmen juʹn kuullâmpooddi alttummuž.

– Sääʹm-meer lij vaalmâš kuullâmpooddi alttummša. Jeäʹrben puärrsab säʹmmlain iʹlla äiʹǧǧ kuʹǩes vuârddmõʹšše. Jõs čuuʹt kuuʹǩǩ vueʹrdet, de leäʹp mâʹŋŋlest, vuäinn Jefremoff.

Komissaar Irja Jefremoff haaʹleʹči piâssâd joʹttu kuullâmpooddin õõutsââʹjest säʹmmlaivuiʹm.

Sääʹmteeʹǧǧ jiõnstummuš leäi čoouǥâs: väärrvuäzzlaž Matti Aikio eʹtǩǩõs piijjâd komissio tuâj kõʹhtte vueiʹti 10–9 jiõnin. Veikko Feodoroff tuäivv, što Sääʹmteeʹǧǧest käunnai tuärjj Saaʹmi siidsåbbar tuõivvja juäʹtǩǩed jiijjâs joouk seʹst komissiotuâj.

– Tuäivam, što Sääʹmteeʹǧǧest vueiʹnet tän mij nääʹl, što mij haaʹleep ââʹnned komissio viõǥǥâst. Sääʹmteʹǧǧ ij vueiʹt årstâʹtted tuâj õhttu, mij-han leäʹp koolmâs tän tååimast mieʹldd, särnn Feodoroff.

Valdiasuåvtõõzzâst lij še haall juäʹtǩǩed komissiotuâj

Väʹlddminister valdiapiisar Henrik Haapajärvi mieʹldd Lääʹddjânnam valdia lij õinn tuõʹđi čõnnõõttâm juäʹtǩǩed saaʹmi tuõttvuõtt- da suåvadvuõttkomissio tuâjaivuiʹm.

– Komissio tuâj alttummšest lie puättam ouʹdde vaiggâdvuõđid, kååʹtt lij fiʹttjemnalla, ko kõõččmõõžžâst lij oʹdinakai prosess da tõn tuejjeet vuõssvuâra Lääʹddjânnam historiast. Sääʹmteeʹǧǧ tuʹmmstõõǥǥ mâŋŋa komissio sââj smiõttâd õõutsââʹjest komissio valmštõõllam vueʹsspieʹlivuiʹm, särnn Haapajärvi.

Saaʹmi siidsååbbar, valdiasuåvtõs da Sääʹmteʹǧǧ saǥstâʹlle ääʹššest puõʹtti peeiʹvi ääiʹj.

– Leäʹp obb ääiʹj ooccmen õhttsaž ääiʹj näkkam såbbra. Tuâivam, što komissio vuäitt juäʹtǩǩed.

Teevvum 11.8.2022 čiâss 14:09: Valdiasuåvtõõzz kommeeʹnt lââʹzztum tekstta.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.