Njuike sisdoaluide

Geahča sáddaga: Vuohču gilážis ráhkkanit olles fárttain márkaniidda – "Gilli gal eallá"

Márkanat lágiduvvojit 13.–14.8. guovdu Vuohču gili.

Maiju Saijets / Yle
Jenna Keskinen, Marja-Leena Magga, Katja Magga ja Inga Äärelä leat olles fárttain ráhkkaneame Vuohču márkaniidda. Doaimmaheaddjin Vuohčus Kirsti Länsman.

Vuohčus lágidit márkaniid dán vahkuloahpas ja gilis leatge ráhkkaneamen doaluide olles fárttain.

Vuohču gilisearvvi ságadoalli Inga Äärelä muitala, ahte sii leat álgán plánet márkaniid juo mannan čavčča. Márkaniid earenomášvuohtan Äärelä namuha oktiigullevašvuođa.

– Dat ahte oažžut oktii gili olbmuid, Vuohču gilli gal eallá, rámida Äärelä.

Äärelä lea movtta, go márkaniidda leat boahtime olu duojárat vuovdit iežaset buktagiid.

– Vuovdit leat dehálamos oassi min márkaniin ja sii bohtet viidát olles Lappi guovllus. Mis leat maid hui čeahpes duojárat maid min iežamet gilis, dadjá Äärelä.

Duojit, musihkka ja teáhter

Vuohččulaš silbaduojár Katja Magga lea mielde čiŋaidisguin márkaniin ja vuordá iluin vahkuloahpa.

– Lea somá, go olbmot bohtet deike miehtá Sámi ja beassá deaivat fulkkiid. Min bearaš fitná juohke háve dáppe, muitala Magga.

Jus iežas gilis juoga dáhpáhuvvá, de gal juo dan dihte gánniha vuolgit geahččat, árvala Magga.

– Go leat nu guhká ja olu bargan daid ovdii, de maninbat ii gánnit boahtit.

Sotnabeaivve Vuohču márkaniin čájehuvvo Lisman Ministeri -teáhterbihttá. Bihtá giehtačálli Marja-Leena Magga muitala, ahte čájálmas vuođđuduvvá duohtadáhpáhusaide soađi maŋŋá. Lismá ministara muitalusa máŋgasat dovdetge Sámis.

– Ávžžuhan olbmuid váldit báhpára fárrui. Ii fal morašgatnjaliid geažil, muhto reaškkasa ja ilu gatnjaliid dihte, bohkosa Marja-Leena Magga.

Márkanat lágiduvvojit 13.–14.8. guovdu Vuohču gili. Márkaniin lea vejolaš gávppašit dujiid ja eará buktagiid. Dárkilut prográmma gávnnat dáppe (siirryt toiseen palveluun).

Lágideaddjit sávvet fiinna dálkki vahkulohppii. Govva: Maiju Saijets / Yle

Doaimmaheaddji Kirsti Länsman ja govvejeaddji Anneli Lappalainen finaiga gulaskuddame lágideaddjiid, oassálastiid ja gili olbmuid jurdagiid ovdal márkaniid.

Yle Sápmi sáddii bearjadaga njuolggostreama Vuohčus ja dan lea vejolaš geahččat Yle Areenas. Mielde sáddagis ledje Vuohču gilisearvvi ságadoalli Inga Äärelä, gilisearvvi bargi Jenna Keskinen, silbaduojár Katja Magga ja Marja-Leena Magga, guhte muitalii Lisman Ministeri -teáhterbihtás.

Beaivvi ságaid ja Yle Ođđasiid Sámis sáhtát maid guldalit Yle Areenas.