Njuike sisdoaluide

Ánnámáret loaiddasta bivnnuhis Flow-festiválas – lea mielde maiddái Dáidagiid ijas installašuvnnas, mii gieđahallá šlájaid jávkama

Flow-festivála lea okta Suoma stuorimus festiválain. Anna Näkkäläjärvi-Länsman lea niegadan guhká dan birra, ahte beassá dohko.

Ánnámáret, Anna Näkkäläjärvi-Länsman vuordá gealdagasas, ahte beassá Flow-festivála lávddi ala. Govva: Karoliina Juhola

Musihkkár Ánnámáret, Anna Näkkäläjärvi-Länsman loaiddasta Flow -gávpotkultuvra- ja musihkkafestiválas sotnabeaivve. Flow-festivála lea okta Suoma stuorimus festiválain. Doppe loaiddastit maid earret eará Gorillaz ja Florence + The Machine.

Näkkäläjärvi-Länsman lea gealdagasas. Son lea niegadan Flow-festiválii oassálastimis jo guhká.

– Dál dat niehku lea duohta, de lea hui fiinna dovdu, muitala Näkkäläjärvi-Länsman.

Näkkäläjärvi-Länsman bargá artistan olu ieš ja son leage máŋgii evttohan festiválaide iežas musihka. Dán háve su evttohus manai čađa.

Flow-festivála lea stuorra festivála, mas leat máŋggat lávddit, gos artisttat loaiddastit. Näkkäläjärvi-Länsman čuojaha The Other Sound -lávddis. Lávdi lea stuorra hálla siste, ja doppe lea vejolašvuohta geavahit effeavttaid.

Ulbmilin leage čájehit video, mii lea Näkkäläjärvi-Länsmanii dehálaš oassi su ovdánbuktimis. The Other Sound -lávdi ii soaitte leat fysalaččat dat stuorámus lávdi, gos Näkkäläjärvi-Länsman lea čuojahan, muhto ollisvuohta gal lea.

– In leat goassege leamaš artistan nie stuora festiválas ovdal.

Ođđa bihtát maid gullojit Flow-festiválas

Helssega guvlui Näkkäläjärvi-Länsman vuolgá odne bearjadaga. Ihttin son deaivvada musihkkajoavkkuinis ja beaivvit leat dievva ráhkkananbarggut ovdal go lávkejit lávddi ala Flow-festiválas sotnabeaivve diibmu 16.00.

Näkkäläjärvi-Länsman lea jurdagiid dásis juo guhká ráhkkanan festiválii. Son lea jurddašan, mot hábmet konseartta vai heive juste dohko. Maiddái ođđa bihtáid leat ráhkadan festivála várás.

Video, man áigot čájehit, lea Näkkäläjärvi-Länsman bargan ovddas Marja Viitahuhtain geassemánus Näkkäläjärvi-Länsmana ruovttuguovlluin. Viitahuhta lea editeren video.

Miellačájáhus lea okta oassi dáidagis

Flow -festivála lassin Näkkäläjärvi-Länsman searvá boahtte vahkkus Helssegis dáidagiid ija installašuvdnii, mii muittuha šlájaid jávkamis.

Helsinkiviikot ordne Dáidagiid idja -dáhpáhusa borgemánu 18. beaivve. Näkkäläjärvi-Länsman lea ovttasbargan dáiddariiguin Jonas Staalain ja Radha D’Souzain Comrades Against Extinction -dáiddabihtás. Doppe ceaggana muitomearka jávkan eallišlájaid muitun.

– Dat čalmmustahttá birrasa, ahte dan galgá gádjut ja suodjalit, ahte eai boađáše lasi dat šlájaid jávkamat.

Dáiddabihttái gullá miellačájáhus, mas gullo maid su musihkka. Musihka Näkkäläjärvi-Länsman lea ovttasbargan Anni Elifiin ja Ali Saadain. Dáiddár guovttos leaba čállán muitoteavstta jávkan šlájaide. Dát buot ovdanbuktojuvvo Helssega guovddážis ja miellačájáhus nohká muitomearkka lusa.

Näkkäläjärvi-Länsman lea bidjan luođi ovtta jávkan eallišládjii, ruigui, mii gávdnui Kiinnás.

– Ruoigu lei dan láhkai oahpis, go dat sulastahtii bohcco. Dat lei lahka, lei álki oažžut dasa oktavuođa, muitala Anna Näkkäläjärvi-Länsman.

Guldal, maid musihkkár Anna Näkkäläjärvi-Länsman muitala iežas ovdanbuktimiin Flow-festiválas ja Dáidagiid ija installašuvnnas. Doaimmaheaddji Marianne Ketola jearahallá.