Njuike sisdoaluide

Ijahis ija buvttadeaddji vuosttaš festiválatipsa: Anárjávrái fatnasiin Ailu Valle rápšuoŋaid távttas

Ijahis Idja -musihkkafestivála lágiduvvo dán vahkuloahpa Anáris fas guovttebeaivásaš dáhpáhussan.

Buvttadeaddji Oula Guttorm jáhkká, ahte dán jagi festiválaprográmmas lea juohkehažžii juoidá. Govva: Anni-Saara Paltto / Yle

Eamiálbmogiid musihkkadáhpáhus Ijahis Idja -festivála lágiduvvo fas dán vahkuloahpa Anáris 19.–20.8. Festivála ordnejit korona jagiid maŋŋá fas guovttebeaivásaš dáhpáhussan. Buvttadeaddji Oula Guttorm jáhkká, ahte dán jagi Ijahis Idja geasuha olbmuid.

– Dán geasi muđuige Suomas leamašan festiválat ja dáhpáhusat eanet go goassege. Sihkkarit olbmuin leamašan miella vuolgit dáhpáhusaide, go dat lea vejolaš. Iežamet mielas mii leat lihkostuvvan dan prográmma ráhkadeamis maiddái nu, ahte doppe lea juohkehažžii veháš juoidá, árvala Guttorm.

Festivála ovdabileahtaid lágideaddjit leat dán rádjái vuovdán dábálaččat. Guttorm muitala, ahte vásáhusa mielde eanaš olbmot ostet bileahtaid goit easka uvssas.

– Oalle olu olbmot gehččet dálkki. Ja muđuidge sápmelaččat leat dakkárat, ahte eathan mii láve diehtit gosa mii áigut, ovdal go dalle go vuolgit gosa nu, bohkosa Guttorm.

Fanasmátkái ráddjejuvvon mearri bileahtat

Buvttadeaddji tipse, ahte dán háve álbmogis lea vuosttaš geardde vejolašvuohta vásihit artistta loaiddasteami fanasmátkkis Anárjávrris. Musihkkár Ailu Valle konsearta lágiduvvo bearjadaga ovttasbarggus báikkálaš turismafitnodagain.

– Jurdda vulggii das, go mis lea dáhpáhus dás gilis ja masá Anárjávrri gáttis, de maninba ii geahččalivččii diekkára, ahte mii bijašeimmet dohko fatnasii artistta ja dat livččii dakkár Ijahis Idja -fanastuvra. Šaddá miellagiddevaš oaidnit gávdnetgo olbmot dohko, smiehttá Guttorm.

Jus fanastuvra oktan konsearttain geasuha olbmuid, de lágideaddjit soitet váldit dan bissovaččat prográmmii.

– Dieđusge mii sávvat, ahte dohko olbmot mannet. Ja dálhan lea čájehan oalle buorre dálkki. Jáhkášin dat lea oalle somá olbmuide doppe čohkohallat ja guldalit musihka ja geahčadit Anárjávrri, dadjá Guttorm.

Jus jávrri ala áiggoš beassat guldalit konseartta, de ferte goit doapmat.

– Dohko gánneha oastit bileahtaid jođáneamos lági mielde juo dange sivas, ahte vaikko dat lea stuorra fanas, de dat sajit leat goit ráddjejuvvon. Čuđiid mielde olbmuid eai sáhte váldit, dadjá Guttorm.

Ijahis Idja-festivála prográmma gávnnat dáppe. (siirryt toiseen palveluun)

Ijahis Idja -festivála buvttadeaddji Oula Guttorm lea buriin mielain ráhkkaneame vahkkolohppii. Doaimmaheaddjin lea Anni-Saara Paltto.

Yle Sápmi lea Ijahis idja -festivála ovttasbargoguoibmi.

Beaivvi ságaid ja Yle Ođđasiid Sámis sáhtát maid guldalit Yle Areenas.