Njuike sisdoaluide

Siidsåbbar eʹtǩǩõs vuäitt peälšted obb tuõttvuõtt- da suåvâdvuõttkomissio tuâj – Sääʹmteeʹǧǧ halltõs tuʹmmai vueʹzzstes komissio juätk

Saaʹmi siidsååbbar da valdia seʹlvvteškuäʹtte, mäʹhtt tuõttvuõtt- da suåvâdvuõttkomissio tuâj vuäitt juäʹtǩǩed. Sääʹmteeʹǧǧ halltõs noorââtt sõrgg tuʹmmjed juätkktååimain.

Sääʹmteeʹǧǧ väärrsaaǥǥtuõʹllʼjeei Anni Koivisto da saaʹmi ouddoumaž Veikko Feodoroff mušttle tuõttvuõtt- da suåvadvuõttkomissio puõʹtti ääiʹjest. Govva: Marja Väänänen / Yle, Ville-Riiko Fofonoff / Yle

Saaʹmi siidsååbbar da Sääʹmteʹǧǧ noorõʹtte piâtnâc õõutâst Lääʹddjânnam valdiain saǥstõõllâd, mäʹhtt säʹmmlai tuõttvuõtt- da suåvâdvuõttkomissioin âlgg juäʹtǩǩed.

Mõõnni neäʹttel Sääʹmteeʹǧǧ tiuddsååbbar tuʹmmji årstâʹtted komissiotuâj ij-ǥa vaʹlljääm ođđ komissaarid. Kuuitâǥ Saaʹmi siidsåbbrest da Lääʹddjânnam valdiast leʹčči õinn haall juäʹtǩǩed tuâjain.

Saaʹmi ouddooumaž Veikko Feodoroff mušttal, što såbbrest saǥstõʹlle ouddmiârkkân tõn, mäʹhtt komissio piisarkåʹdd da komissaar vuäitče kõõut ääiʹj juäʹtǩǩed tuâjast.

– Što vueiʹtet paaʹlǩid mäʹhssed, de âlgg tuâjj juätkkjed.Täʹst âʹlǧǧe tuõđi leeʹd tuâj, mâid tuejjee. Tõt lij leämmaž valdiast huõllân.

Feodoroff mušttal, što valdiast leäi fiʹttjõs Saaʹmi siidsåbbar eʹtǩǩõʹsse, što nuõrttsäʹmmla vuäitče juäʹtǩǩed jiijjâz meer aaʹššivuiʹm tuõttvuõtt- da suåvâdvuõttkomissiotuâj.

– Kâʹl sij vueiʹnne, što tät lij õhtt mäinn, koin vuäitči komissiotuâj juäʹtǩǩed nääiʹt lääǥǥliʹžžen, ij-ǥa šõõddče ni mii proʹbleeʹm täʹst, mušttal Feodoroff.

Saaʹmi ouddooumaž Veikko Feodoroff mušttal, måkkam tobdâlmin siidsååbbar, Sääʹmteʹǧǧ da riikksuåvtõõzz kanslia norrâʹtte mõõʹnni neäʹttlest. Tååimteeʹjen Janica Gauriloff.

Sääʹmteeʹǧǧ halltõs âânn såbbar juätk pirr

Mõõnni neäʹttel tuʹmmstõõǥǥ vuâđald, Sääʹmteʹǧǧ âlgg tuejjeed jiijjâs tååimaid.

Tiuddsååbbar õõlǥči nõõmted kueʹhtt ođđ komissaar. Ouddâl nõõmtum komissaar Miina Seurujärvi da Heikki Hyvärinen rätkkje komissaartååimast.

Sääʹmteeʹǧǧ väärrsaaǥǥtuõʹllʼjeei Anni Koivisto mušttal, što halltõs noorââtt nuʹt jåʹttlânji ko pâi vueiʹtlvaž.

– Täävtõssân lij, što vuäǯǯap sååbbarääiʹj nuʹt jåʹttlânji, što piâssâp mõõnnâd čõõđ tiuddsåbbar tuʹmmstõõǥǥ da tuejjeed tuʹmmstõõǥǥ juätkktååimain. Halltõõzzâst mij čõõđtep tiuddsåbbar tuʹmmstõõǥǥ, mušttal Koivisto.

Sääʹmteeʹǧǧ väärrsaaǥǥtuõʹllʼjeei Anni Koivisto mušttal, što Sääʹmteʹǧǧ puätt väʹldded saaʹmi siidsåbbar eʹtǩǩõõzz lokku jiijjâs tuʹmmstõõǥǥin.

Saaʹmi siidsååbbar haaʹleʹči juʹn altteed jiijjâs meer kõõskâst tuõttvuõtt- da suåvâdvuõttkomissio kuullâmpooddid. Koivisto mušttal, što tän tuõivvi Sääʹmteeʹǧǧ halltõs puätt väʹldded lokku jiijjâs tuʹmmstõõǥǥin.

– Tät lij vuäinalm, koon Sääʹmteeʹǧǧ halltõs âlgg väʹldded lokku teʹl, ko juätkktååimaid ǩiõttʼtõõlât. Ko leäʹp oʹdinakai proseeʹssest, de jie-han meeʹst leäkku vaalmâš vaʹsttõõzz näkam sõõʹjid. Lij vääžnai, što čåuddmõõžžid kååitat kaunnâd õõutsââʹjest puki vueʹssbieʹlivuiʹm, särnn Koivisto.

Saaʹmi ouddooumaž Veikko Feodoroff kooll še jiõčč Sääʹmteeʹǧǧ halltõʹsse. Feodorooffâst lij huõll, jõs obb komissiotuâjj kââmat kõõut diõtt.

– Tuõđi mij eʹtǩǩõs vuäitt kâʹl peälšted tän komissio, što ij puuđ obbnes, što vueiʹttep mijnalla juäʹtǩǩed tän tuâj, särnn Feodoroff.

Yle Sääʹmm iʹlla veâl poppâttam Lääʹddjânnam riikksuåvtõõzz eeʹttkõʹsttjid kommentâʹstted ääʹšš.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.