Njuike sisdoaluide

Yle Sápmi galledii Ijahis idja -festivála: bearjadaga vuordimis olu luohti iešguđetlágan musihkkastiillaiguin

Yle Sápmi sáddii njuolggosáddaga Ijahis ija festiválaguovllus bearjadaga. Geahča sáddaga dás.

Johan Ivvar Gaup, Mikkel Mathis Hætta, Bernt Mikkel Haglund Ijahis idja -festivaaleilla
Juoigi Johan Ivvar Gaup lea oassin Bernt Mikkel Haglund luohtejoavkku ja son illuda ođasmahttit luođi otnábeaivái. Sii ledje mielde Yle Sámi njuolggosáddagis Ijahis idja -festiválas. Joikaaja Johan Ivvar Gaup on osana Bernt Mikkel Haglundin joikaajaryhmää ja hän iloitsee uudistaa joikua nykypäivään. He olivat mukana Ylen suorassa lähetyksessä Ijahis idja -festivaaleilta.

Eamiálbmogiid musihkkafestivála Ijahis idja ordnejuvvo 19.–20.8. Anáris dán háve fas guovttebeaivásaš festiválan.

Festivála álggii mánáid- ja nuoraidbeivviin. Lávddi alde ledje mánáid ja nuoraid iežaset joavkkut, earret eará ohcejohkalaš Jesse Ruokolainen. Ruokolainen ovttastahtá ráp- musihka iešguđetlágan elemeanttaid eará musihkkastiillaiguin. Iežas bihtáid ráhkadeami lassin son jorgala ja heiveha sámegillii maiddái jáhpangielat musihka.

– Dat lea erenomáš proseassa, go dat giella lea nu erenomáš. Das leat dihto seammaláganvuođat. Liikká dat heive hui bures. Háliidin jorgalit de dallehan mun jorgalin, čaimmai Ruokolainen Yle Sámi njuolggosáddagis.

Sáhtát geahččat olles

Ijahis idjan streamin juontajat Xia Torikka ja Linda Tammela.
Dás sáhtát geahččat olles njuolggosáddaga. Váidalahtti sáddagis ledje veaháš jietnaváttisvuođat.

Festiválas iešguđetlágan musihkkagenret

Festiválas lea vuot máŋggabealát sámemusihkkafálaldat, go lávddi ala gorgŋot goittotge Angelit, Arvvas, Bernt Mikkel Haglund ja juoigit, Emil Kárlsen, Evvan nõmmpeei´v, ISÁK ja Intrigue.

Bernt Mikkel Haglund joavkkuinis lea vuosttas geardde Ijahis ijas. Son ovttastahtá iežas musihkkas tekno ja árbevirolaš luođi. Haglund lea ieš dj-buvttadeaddji ja su juoigin leaba Mikkel Mathis Hætta ja Johan Ivvar Gaup. Joavku vuordá šaddat albma juoiganfeastta ja sis lea maid ođđa bihtá čuojahanláhkai.

– Go Sámis lea festivála, doppe eatnašat máhttet juoigat ja dávjá juiget min fárus, lohká Gaup.

Haglund joavku čuojaha bearjadateahket.

Joavkku lassin bearjadaga vuosttas geardde Ijahis ijas čuojaha maiddái Emil Kárlsen, guhte lea olu beaggán geasi áigge Sámi festiválain ja dáhpáhusain. Bearjadaga konseartta maŋŋá son vuoddjá fas Álttái, gos son čuojaha lávvardaga.

– Dál gal lean vehá váiban, muhto leamaš hui somá beassat deaivvadit olbmuiguin ja johtit, muitala Kárlsen johtti artistaeallima birra.

Dego juo láve, festiválas gullat lávvardaga maiddái árbevirolaš sámemusihka konseartta, mas loaiddasta earret eará Semen Bolshunov, guhte lea eret Ruošša beale Sámis.

Áibbas ođđa prográmmaoassi lea Talent stage, mas nuorra musihkkačeahpit besset čájehit dáidduideaset. Talent stages čuojaha earret eará Erke Eriksen joavkkuinis. Talent stage -prográmmaoassi lea lávvardaga.

Yle Sápmi lea Ijahis idja -festivála ovttasbargoguoibmi.

Beaivvi ságaid ja Yle Ođđasiid Sámis sáhtát maid guldalit Yle Areenas.