Njuike sisdoaluide

Ovtta ášši sáhttá muitalit máŋgga láhkai ja dasa dárbbašuvvojit synonymat – John Anders Sikku ráhkadii dain applikašuvnna

Applikašuvdna lea dahkkon jagis 2005 almmustuvvan Jovnna-Ánde Vest Sámi synonymat -girjji vuođul.

John Anders Sikku lea oppa áigge ráhkadeamin Sámi synonymat -applikašuvnnas veršuvnna maid Android-geavahanvuogádaga várás. Govva: Linda Tammela / Yle
Olmmoš vajálduhttá muhtumin sániid dahje háliida gávdnat nuppi sáni, mii govvidivčče ášši buorebut. John Anders Sikku álggii dan dihte ráhkadit telefonapplikašuvnna sámi synonymain.

Muohta, luotkku, suovvi, soavli, šalka... Ovtta sátnái sáhttá leat vaikko man galle synonyma sámegielas. Dál daid sáhttá álkit ohcat oktan čilgehusaiguin telefonapplikašuvnnain.

Sámi synonymat -applikašuvnna lea ráhkadan John Anders Sikku, ja dat lea dahkkon jagis 2005 almmustuvvan Jovnna-Ánde Vest seammanammasaš Sámi synonymat -girjji vuođul.

– Muhtumin olmmoš vajálduhttá sániid, iige dovdda sániid. Olmmoš dávjá jurddaša, ahte galggašii synonymasátnegirjjis geahččat, nuhan de galggašii áppa leat dán áigge. Nu mun de ožžon dan jurdaga, čilge John Anders Sikku Buorre iđit Sápmi -sáddagis.

Applikašuvdna fállá maid čilgehusaid sániide

Sikku muitala, ahte son lea čohkkán máŋga mánu hábmemin teavstta vai prográmma sáhttá ráhkadit. Applikašuvnnas sáhttá ohcat dihto sáni ja dat fállá dasa iešguđetlágan synonymaid. Dat maiddái ohcá automáhtalaččat čilgehusaid sániide. Čilgehusat leat eaŋgalsgillii.

– Lea álki gávdnat justa dan sáni, maid don háliidat, Sikku lohká.

Sikku árvala, ahte applikašuvnnas sáhttá leat geasa beare ilu ja ávki.

Applikašuvdna doaibmá dál Apple-telefovnnain, muhto farggabáliid maid Android-geavahanvuogádagas.

Beaivvi ságaid ja Yle Ođđasiid Sámis sáhtát maid guldalit Yle Areenas.