Njuike sisdoaluide

Guldal jiena: Giellabesiid ruhtadeapmi unnu – váikkuha goittot materiála buvttadeapmái

Dán jagi lei buoret dilli, go stáhta nu daddjon juovlaskeaŋkaruđain baste ráhkadit doarjjamateriála giellabesiide.

Niina Aikio-Siltala jođiha giellabeassedoaimma Sámedikkis. Govva: Vesa Toppari / Yle
Guldal Niina Aikio-Siltala jearahallama dás.

Sámegielat giellabesiid ruhtadeapmi unnu boahtte jagi masá njealjádasain dán jagi ektui. Stáhta budjeahtas jahkái 2023 lea várrejuvvon 1,2 miljon euro 12 giellabeasi doibmii.

Geahppáneapmái váikkuha dat, go dán jahkái 2022 stáhtta juolludii nu daddjon juovlaskeaŋkaruđa ja boahtte jagi budjeahtas dat ii leat mielde.

Mearreáigásaš giellabeassejođiheaddji Niina Aikio-Siltala Sámedikkis dadjá, ahte boahtte jagi mearreruđainge gal birge muhto dihto áššiid ii sáhte ollašuhttit.

– Vuosttas ášši mii bisána leat dát min hirbmat bures johtui vuolgán materiálabargu. Mis leamaš dál guokte árrabajásgeassima materiála plánejeaddji, nubbi lea álggahan miessemánus ja nubbi suoidnemánus. Diet bargu nohká dán jagi loahpas.

– Nubbi sadji gos ferte seastit lea nu daddjon koordinašuvdnaruhta, mainna leat ruhtaduvvon ovdamearkan giellabeassebargiid oanehis skuvlejumit, dadjá Niina Aikio-Siltala.

Dálá giellabesiin doaibma joatkašuvvá. Anárašgielat giellabeasit leat Anáris guokte ja Avvilis okta. Nuortalašgielat beasit fas leat Čeavetjávrris ja Avvilis.

Davvisámegielat giellabeassedoaibma lea Vuohčus, Soađegilis, Roavvenjárggas ja Oulu gávpogis sihke golmma gilis Ohcejoga gielddas.

Suomas sámiid kultur- ja giellabeassedoaibma lea oaivvilduvvon sámebearrašiid vuollái skuvlaahkásaš mánáide. Árrabajásgeassima materiálaid earet eará giellabesiid várás buvttada Sámedikki sámegiela doaimmahat.

Yle Ođđasiid Sámis ja Beaivvi ságaid sáhtát maid guldalit Yle Areenas.