Njuike sisdoaluide

Skuvlaradio lea báhcán oktan áiggi mearkan historjjás – dál dáid 30–40 jagi boares prográmmaid beassá gullat Ealli arkiivvas

Badjelaš 30 jagi dassá nohke skuvlaradio oahpahusprográmmat radios. Sámegillii dat buvttaduvvojedje eanemus jagis 1984 jahkái 1988.

Ritva Torikka lea bargan skuvlaradio buvttadeaddjin Yles 1980-logus ja mánáidprográmmaid buvttadeaddjin ja doaimmaheaddjin dan maŋŋá. 1990-logus geavahusas ledje vel jietnabáttit. Govva: Yle Sápmi
Mii lea báhcán muitui skuvlaradio buvttadeamis? Guldal Ritva Torikka jearahallama dás.

Vahkkosaš vuorkáságain Yle Sápmi joatká boares skuvlaradioprográmmaid sáddema.

Yle sámegielat doaimmahus sáddii moanaid skuvlaradioprográmmaid juo 1970-logu rájes. Jagis 1984 jahkái 1988 oahpahusministeriija doarjagiin Yle sáddii jeavddalaččat skuvlaradio, máŋgalogi ain jagis. Daid buvttadeaddjin barggai Ritva Torikka.

Doaimmaheaddjin dain prográmmain ledje oahpaheaddjit, skuvlanuorat ja Yle Sámi bargit. Buvttadeaddji somámus muittut gusket ovttasbarggu skuvllaiguin.

– Buot eanemus lea báhcán millii dat go bargen skuvllaiguin, mánáiguin ja oahpaheaddjiiguin ovttas, dat lea somás muitu.

Sámi radio lea vurken masá buot skuvlaradio sáddagiid, muhtin dain lea jávkange. Govva: Jouni Aikio / Yle

Sámegielat skuvlaradio ovdii galggai bargat, dat ii gullan fitnodaga fásta fálaldagaide.

– Dan áiggi Yleisradios ledje vel skuvlaradio prográmmat. Sámegielat prográmmaid várás galggaimet Yles vuos ohcat ruhtadeami ja Yle fas ozai ruđa dan vuođul oahpahusministeriijas, jahkái ain hávil, muitala Ritva Torikka.

Prográmmain gullojit máidnasat, gullugovat ja nuoraid iežaset hutkan suohttasat

Dál dáid 30–40 jagi boares prográmmaid beassá fas gullat Yle Sámi radios Yle Areena Ealli arkiivvas. Giđđat 2022 sáddiimet juo Ealli arkiiva -nama vuolde 13 skuvlaradioprográmma, mat lea buvttaduvvon 1980-logus.

Dán čavčča joatkit ain nuoraidprográmmaid ja oahpahusradio ságaid sáddema nu, ahte Areenas leat dasto moaddelot boares oahpahus- ja nuoraidprográmma gullanláhkai.

Muhto man bures dat heivejit dán áigge oahpahussii?

– Oassi heivejit nu mo máidnasat ja smávva gullugovat, maid dagaimet mánáiguin ja oahpaheaddjiiguin, dathan gal heivejit. Doppe leat prográmmat mat govvejit sámiid ja skuvlla historjjá, dakkárat main oasi sáhttá geavahit otnábeaivvege oahpahusas, árvala Ritva Torikka.

Ealli arkiivva gulat Yle Sámi radios juohke vahku duorastaga diibmu 10.00 ja nuppádassii bearjadaga diibmu 14.00. Fáddan leat earret eará skuvllaid ja ruovttuid ovttasbargu, muitalan- ja máinnastandáidu, nuoraid astoáigge doaimmat ja nuoraid iežaset ráhkadan radioprográmmat.

Buot ságat báhcet gullanláhkai maid Yle Areenai Ealli arkiiva -bajilčállaga vuollái.

Beaivvi ságaid ja Yle Ođđasiid Sámis sáhtát maid guldalit Yle Areenas.