Njuike sisdoaluide

Miellačájáhus: "ILO-soahpamuš ii oro ovdáneamen dán ráđđehusbaji áigge"

Helssegis lágiduvvo fas miellačájáhus ILO 169 -soahpamuša beales gaskavahku. Miellačájáhusa lágideaddji oaivvilda, ahte Suoma ráđđehus lea fas dájuhan olbmuid, go lea bidjan ILO-soahpamuša ráđđehusprográmmii, muhto ii de daga maidege ášši ovdii.

Govva: Vesa Toppari / Yle Sápmi

Helssegis lágiduvvo fas miellačájáhus ILO 169 -soahpamuša beales gaskavahku. Miellačájáhusa ulbmilin lea gáibidit ILO-soahpamuša ratifiseremii viimmatge beaivemeari.

Lágideaddjit muittuhit dáhpáhusa Facebook-siiddus, ahte ILO 169 -soahpamuša dohkkeheamis boahtá dan jagi 25 jagi.

- Suoma ráđđehus lea fas dájuhan olbmuid, go lea bidjan ILO-soahpamuša ráđđehusprográmmii, muhto ii de daga maidege, dadjá lágideaddji Henrik Nyholm Gurotlihtus.

"Jos ráđđehusa evttohus ii boađe riikkabeivviide dán giđa áigge, de ášši ii šat ovdán"

Nyholm váruha, ahte ILO-soahpamuš ii geargga ovdánit dán ráđđehusbaji áigge.

- Jos ráđđehusa evttohus ii boađe riikkabeivviide dán giđa áigge, de ášši ii šat ovdán dán ráđđehusbaji áigge. Čakčat riikkabeaivvit eai šat váldde ođđa áššiid gieđahallamii, daningo válggat leat jo nu lahka.

Miellačájáhusa lágidit Nyholm lassin sierra ON-lihtu lahttosearvvit. Seammasullasaš dáhpáhusa lágidedje maid diibmá Sámi álbmotbeaivve áigge.

Miellačájáhus álgá gaskavahku diibmu 14 riikkabeivviid ovddas.