Njuike sisdoaluide

UMK-njelješ Solju bargágoahtá dál iežas skearruin

UMK-vásáhusa maŋŋá Solju geahččá jo boahtteáigái. Plánain lea dál iežas skearru.

Solju ja Hold Your Colours -bihtá dahkkit Linda ja Ylva Persson UMK-finálas 2015. Govva: Vesa Toppari / Yle

Yle Sápmi jearahalai Soljju dalán bohtosiid almmustahtima maŋŋá.

Solju lei loahpaloahpas Ođđa Musihka Gilvvu, UMK-gilvvu, njealját Pertti Kurikan Nimipäivät, Satin Circus ja Opera Skaala maŋábealde.

– Munnos lea buorre dovdu. Giitu buot jienasteaddjiide, geat leat jienastan munno. Giitu olu!, Ulla Pirttijärvi-Länsman dajai.

– Duođaid duđavaččat! Giitu olu buohkaide, geat leat dorjon min. Ooh, dat lea leamašan duođaid somás mátki!, Hilda Länsman dajai.

Govva: Aletta Lakkala / Yle

Máhtiidego doai vuordit dákkára bohtosa?

– Mu mielas dat lei buorre boađus. Ledje rehkenastán gosnu duoppe neahtain, muhto iihan dain goassege dieđe. Gal moai letne hui duđavaččat ja giitevaččat, Pirttijärvi-Länsman dajai.

– Dat lei hirbmat váttis dadjat, ahte makkár boađus dás boahtá. Dan álgojurys, mii dáppe lei, nu eai boahtán nu hirbmosit čuoggát, muhto hui bures bohte dalle jienasteaddjiin, Länsman dajai.

Govva: Tiia Santavirta

Makkár vásáhus dát UMK-gilvu ollislaččat leamašan? Mii dudnuide bázii gihtii dás?

– Das lea oahpásmuvvan hui somás olbmuide ja dashan lea oahppan olu ášsiid ja oaidnán. Fiinna vásáhus oppalohkái!, Pirttijärvi-Länsman dadjá.

– Duođaid fiinna vásáhus!, Länsman dajai.

Govva: Tiia Santavirta

Mo doai joatkkibeahtti dás ovddosguvlui?

– Moaihan álge bargat ođđa musihka ja de bohtet cd:t olggos sihke Ulddas ja Soljjus. Dasa moai álge ráhkkanit dál boahttevuođas, ahte bargagoahtit iežame skearruin, Pirttijärvi-Länsman muitala.

Govva: Vesa Toppari / Yle

UMK čokkii badjel 100 000 euro finálajienastemiin. Ruđat skeŋkejuvvojit Njunnebeaivečoaggimii geafes mánáid buorrin.

Maid isit ja áhčči geahččá jo boahtteáigái

Govva: Aletta Lakkala / Yle

Finála maŋná Soljju bearraža isit ja áhčči Jari-Heikki Länsman geahččá maid jo boahtteáigái.

– Vaikke eat vuoitán, de birgiimet bures ja mun lean hui duđavaš, ahte manai náge bures. Dás lea buorre joatkit Hilddáguoktá Ulla karrierain boahttevuhtii.

Ulla Pirttijärvi-Länsman isit ja Hilda Länsman áhčči, Jari-Heaika Länsman lei boahtan Ohcejogas čuovvut finála Govva: Vesa Toppari / Yle Sápmi

Maid jáhkát, ahte Solju ii vuoitán dán gilvvu?

– Dát lei kánske menddo femininalaš bihttá euroviisuide, ahte dat galgá leat hui diekkár karismáhtalaš, Länsman smiehtada.

Solju lea Yle Sámi jearahallamis vuossárgga iđitsáddagis diibmu 7.10 rájes. Muitte geahččat Yle Ođđasiid vuossárgga diibmu 15.10 Yle TV1:žis. Doppe lasi dovddut UMK-finálas. Govat Facebookas (siirryt toiseen palveluun)!