Njuike sisdoaluide

Holmberg: UNPFII loahpparaporta livčče sáhttán váikkuhit Suoma ráđđehusráđđádallamiidda

SSN várreságadoalli Ásllat Holmberg dadjá, ahte Suoma olmmošriektedili cuiggodeapmi UNPFII loahpparaporttas livčče sáhttán váikkuhit juobe Suoma ráđđehusráđđádallamiidda. Dál go oktage riika ii leat šat namuhuvvon loahpparaporttas, nu das ii leat seammalágan fápmu, son oaidná.

SSN várreságadoalli Ásllat Holmberg dadjá, ahte UNPFII loahpparaporttas ii leat šat seammalágan fápmu, go Suoma guoski moaitámušat leat sihkkojuvvon eret. Govva: Tuomas Aslak Juuso

Suoma Sámi Nuoraid, SSN, várreságadoalli Ásllat Holmberg dadjá, ahte Suoma olmmošriektedili cuiggodeapmi UNPFII loahpparaporttas livčče sáhttán váikkuhit juobe Suoma ráđđehusráđđádallamiidda.

– Das livččii sáhttán leat stuorrage mearkkašupmi, go Suomas leat áiddo huksemin ođđa ráđđehusa ja čálligoahtimin ráđđehusprográmma. Nu dál jos livčče badjánan diekkár ášši, ahte Suopma namuhuvvo diekkár oalle heittot listtus, nu dat livčče dieđusge lokten eanet oidnosii sámi áššiid Suomas. Dat livčče sahttán mielváikkuhit dasa, ahte sámi áššit bohtet maiddái ráđđehusprográmmii.

– Galhan dan birra lea goittotge leamašan ođđasiin ja jáhkán dasge leamašan váikkuhus, Holmberg árvvoštallá. 

"Ii leat seamma fápmu"

Ásllat Holmberg dadjá, ahte son ádde nuppe dáfus manin riikalisttu lei sihkkojuvvon eret UNPFII loahpparaportta loahpalaš veršuvnnas.

– Go doppe namuhuvvojedje dušše moadde riikka, nu nuppe dáfus dat orui vehá imaš, ahte mo dat ledje válljen dieid riikkaid justa namuhit. Bissovaš foruma áigge gal gulai sáhkavuoruid birra máilmmi, main namuhedje rihkkumušaid eamiálbmotrivttiide, Holmberg muitala.

– Dál go ii leat oktage riika namuhuvvon, nu iihan raporttas leat seammalágan fápmu, dasgo dál das čuožžu oppalaččat, ahte ávžzuhit buot riikkaid divvut boasttovuođaid eamiálbmogiid ektui, Holmberg árvvoštallá.

Javo: Cuiggodeapmi muittuha álo min riikkaid, ahte dat eai sáhte láhttet mo beare

Sámiráđi presideanta Áile Javo dadjá, ahte máinnašupmi loahpparaporttas seamma listtus go ovdamearkka dihte Kanada, Indonesia, Tansania livčče sáhttán leat heahpat Supmii.

– Suopmahan hálida iežas govahallat dakkár riikan, mii váldá vuhtii olmmošvuoigatvuođaid, nu dat livčče dieđusge oalle heahpat Supmii dat, Javo árvvoštallá.

Áile Javo lea eahpesihkkar das, man olu UNPFII  loahpparaporta livčče loahpaloahpas váikkuhan politihkalaš dillái ruovttus njuolga.

– Mun jáhkán, ahte Suopma livčče heahpanan ja erenoamažit Suoma olgoriikkadepartámángii livčče oalle unohas diet ja soitet, ahte dat livčče boahtteáiggis eambbo geahččalan váruhit, ahte nu ii geavašii ja soaitá, ahte livčče bidjan eará doaimmaid johtui, mat čájehit ahte sii váldet olmmošvuoigatvuođaid vuhtii, Javo dadjá.

– Muhto dieđusge das gal lea álo mearkkašupmi, ahte nie cuiggoduvvojit danin, go dat muittuha min riikkaid, ahte dat eai sáhte láhttet mo beare, ahte máilbmi ii dan fuomáš, dadjá Javo.