Njuike sisdoaluide

SPR evttohan Anne Nuorgam árktalaš guovllu ovddasteaddjin Bissovaš Forumii

Sámiráđi ovdaolmmoš Aile Javo muitala, ahte Sámiráđđi loahpalaččat mearrida áššis. Bealistan mun gal ferten dadjat, ahte Anne lea hui buorre evttohas. Son lea guhká bargan dakkár riikkaidgaskasaš áššiiguin, son dovdá ON vuogádaga hui bures, ja mun jáhkán, ahte son doaimmašii hui bures dakkár rollas, Aile Javo dadjá.

Anne Nuorgam Govva: Eljas Niskanen / Yle

Sámi Parlamentáralaš Ráđđi lea evttohan Anne Nuorgam árktalaš guovllu, sámiid ja inuihtaid, ovddasteaddjin čuovvovaš badjái Ovttastuvvon Našuvnnaid Bissovaš Forumii.

Bissovaš Forum bivdá evttohusaid ođđa lahttun badjái 2017-2019.

Sámiráđi ovdaolmmoš Aile Javo muitala, ahte Sámiráđđi loahpalaččat mearrida áššis čoahkkimisttis golggotmánus Murmanskkas.

– Dál lea dieđusge vuos menddo árrat dadjat, ahte gii dat loahpa loahpas šaddá. Dat lea Sámiráđđi mii dan mearrida iežas čoahkkimis golggotmánus Murmanskkas. Sámi Parlamentáralaš ráđđi lea evttohan Anne Nuorgama ja dán rádjai mun in leat gullan ovttage eará evttohusa, Javo muitala.

Aile Javo ieš persovnnalaččat oaidná, ahte Nuorgam livččii buorre olmmoš Bissovaš Forumii.

– Bealistan mun gal ferten dadjat, ahte Anne lea hui buorre evttohas. Son lea guhká bargan dakkár riikkaidgaskasaš áššiiguin, son dovdá ON vuogádaga hui bures, ja mun jáhkán, ahte son doaimmašii hui bures dakkár rollas, Aile Javo dadjá.

Anne Nuorgam lea Sámiráđi olmmošvuoigatvuođaossodaga jođiheaddji.