Njuike sisdoaluide

Suoma Sámediggi pláne vuoruhit sámesoahpamuša válgabajis 2016–2019

Suoma Sámediggi pláne vuoruhit davviriikalaš sámesoahpamuša válgabajis 2016–2019. Ságadoalli Tiina Sanila-Aikio muitala, ahte ulbmilin livčče beassat čájehit ráđđádallojuvvon soahpamušhápmosa Troandima ávvudoaluin 6.2.2017.

Suoma Sámedikki 2016–2019 nubbi dievasčoahkkin. Govva: Vesa Toppari / Yle

Davviriikalaš sámesoahpamuš vuoruhuvvo Sámedikki doaibmaprográmmas 2016–2019. 

Dat boahtán ovdan dievasčoahkkimii juogáduvvon doaibmaprográmmahápmosis.

Hápmosis leat logahallojuvvon logi válgoulbmila ja dain vuosttas lea davviriikalaš sámesoahpamuša ratifiseren. Sámediggi doaibmaprográmma 2012–2015 váldoulbmil lei ILO 169 -soahpamuša ratifiseren, muhto dat ii ollašuvvan.

Ulbmilin čájehit ráđđádallojuvvon soahpamušhápmosa Troandima ávvudeapmái 2017

Suoma, Norgga ja Ruoŧa oktasaš sámesoahpamušain lea ulbmil nannet sámiid vuoigatvuođaid nu, ahte sámiin lea vejolašvuohta ovddidit giela, kultuvrra, ealáhusaid ja servodaga seammaláhkai riikkarájáin fuolakeahttá.

Sámedikki ságadoalli Tiina Sanila-Aikio oaidná, ahte sámesoahpamuša gánneha dál vuoruhit.

– Na dieđusge go ráđđádallamat leamašan guhká jođus, ja ulbmilin livčče dál ráđđádallanjoavkkus geargat ráđđádallamiin dán jagi lohppii ja nie, ahte dat ráđđádallojuvvon soahpamušhámus livčče oaidninlahkai Troandimis sápmelaččaid 100 jagi ovttasbarggu ávvudeami oktavuođas, de dieđusge dan ferte maiddái Sámedikkis vuoruhit válgabaji doaibmaprogrammas ja bidjat návccaid dasa, vai mii beasašeimmet dan loahppabohtosii, ahte ráđđádallamat leat gárvánan dassážii, Sanila-Aikio dajai ovdal dievasčoahkkima.

Sámedikkiin galgá leat oktasaš čoahkkin Troandimis boahtte sámi álbmotbeaivve 6.2.2017 áigge, go lea gollán 100 jagi sámiid davviriikalaš politihkalaš ovttasbarggu álgimis.

Jienasteapmi veaigin

Doaibmaprográmma lea váldoášši Sámedikki válgabáji nuppi dievasčoahkkimis Sajosis odne bearjadaga.

Digáštallama dán válgabaji deattuhusain sáhttá čuovvut interneahtas (siirryt toiseen palveluun). Čoahkkin lea dál bottus ja joatkašuvvá diibmu 14.15 Suoma áigge.

Bottu maŋŋá Sámediggi jienastan doaibmaprográmmas.

Harmoniseret dili

Tiina Sanila-Aikio oaidná, ahte davviriikalaš sámesoahpamušas boahtá leat stuorra mearkkašupmi Suoma sámiide.

– Doppe leat máŋggat áššit, áššefáttat ja dat guoská hui viidát iešguđet suorggi, eallinsuorggi: sode, sosiala- ja dearvvasvuohtaáššiid, gitta skuvlejupmai ja nie ain. Dat lea dehalaš soahpamuš ja diená, ahte harmoniseret daid diliid erenomažit lágaid dáfus, mat davviriikkain lea, Sanila-Aikio oaidná.

Davviriikalaš sámesoahpamuša ovddideapmi lea maid vuoigatvuohta- ja bargoministtar Jari Lindström (vs) plánain.