Njuike sisdoaluide

Davviriikkalaš sámesoahpamuš orru viimmat ovdáneamin

Davviriikkalaš sámesoahpamuš leamašan barggu vuolde jo jagi 2002 rájes. Soahpamuševttohus galgá leat gárvvis skábmamánu loahpas.

Anne Nuorgam Govva: Eljas Niskanen / Yle

Masá 15 jagi bistán suokkárdallan davviriikkalaš sámesoahpamuševttohusain álgá leat dál loahpa geahčen, muitala Suoma sáttagotti áirras Anne Nuorgam.

Maŋimuš davviriikkaid ovddasteaddjiid oktasaš čoahkkin dollojuvvo skábmamánu loahpas Roavvenjárggas ja dan maŋŋá evttohus galgá leat gárvvis. Go Sámi parlamentáralaš ráđđi lea giehtadallan dan Troandimis boahtte guovvamánus, de evttohus manná sámedikkiide ja dan maŋŋá dasto riikkaid ráđđehusaide ja vejolaččat dađi mielde dohkkeheapmái.

Davviriikkalaš sámesoahpamuš leamašan barggu vuolde jo jagi 2002 rájes, go vuosttas áššedovdijoavku ásahuvvui ráhkadit soahpamuševttohusa. Evttohus válbmanii 2005:s. Bargu bisánii, go evttohus ii ožžon ráđđehusaid guottáhusa. Bargu joatkašuvai jagis 2011 ja galggái gárvánit jo diibmá. ILO-soahpamušain heaibun goittotge ájihii barggu.