Njuike sisdoaluide

Sámedikki ovddasteaddji duhtavaš davviriikalaš sámesoahpamušhápmosii

Suoma ektui deháleamos áššit davviriikalaš sámesoahpamušhápmosis guoskkahit sápmelašmeroštallama ja ealáhusaid. Suoma sámedikki ovddasteaddji Anne Nuorgam lea duđavaš hápmosii.

Jurista Anne Nuorgam leamaš Sámedikki ovddasteaddjin Davviriikalaš sámesoahpamušráđđádallamiin Govva: Vesa Toppari / Yle

Davviriikkalaš sámesoahpamuša mohkit leat váhá njuolgan. Bearjadaga veaigin dat viimmat leai almmolaš nu, ahte sisdoalus diehtit dál váhá eambo. Bargojoavkku Suoma Sámedikki ovddasteaddji, jurista Anne Nuorgam lea duhtavaš dán evttohussii.

– Ráđđádallamat ledje iešalddes váddá, ahte min sápmelaččaid ja stáhtaid ulbmilat eai álo deaividan, ja dan ektui ráđđádallanboađus lea kompromissa buohkaid gaskkas. Dat leat dat, masa stáhtat leat gárvá, makkár vuoigatvuođaid stáhtat lea dál gárvá addit sápmelaččaide.

"Sápmelašmeroštallama ođadeapmi buorádus Suoma beale sámiservodahkii"

Suoma ektui deháleamos áššit guoskkahit sápmelašmeroštallama ja ealáhusaid. Suomas sápmelašmeroštallan viiddiduvvošii guoskat maid máttárváhnemiid sámegieldáiddu. Dan maŋŋá dat livčče seamma linnjás Ruoŧain ja Norggain. Suomas nu gohčoduvvon lappalaispáragrafa fas gahčahuvvošii eret. Meroštallama ođadeapmi lea su mielas dehalaš.

– Dát lea oalle stuorra sámeservodahkii Suoma bealde, ahte mis livčče oktasaš davviriikalaš meroštallan sámedikkiid jienastuslohkui, ja dakko bokte dát livččege stuorra buorádus min Suoma bealde sámiservodahkii, dadjá Nuorgam.

Sámiealáhusaide lasi ruhtadeapmi?

Sámesoahpamuševttohus  ii váldde njuolga beali čáhče- ja eananrivttiide, nu ahte dat bisošedje ovddežis. Juos evttohus goit goasnu dohkkehuvvo, Suomas sámiealáhusain ruhtadoarjja buorránivčče Nuorgama mielde.

– Stáhtat galget ovddidit sámi ealáhusaid, ja dat ovddidit dán áššis, maiddái sisttisdoallá stáhtaid geatnegasvuođaid ordnet maiddái ruhtadeami sámi ealáhusaide ja daidda gullet buot dát árbevirolaš sámiealáhusat ja dieđusge maiddái duodji.