Njuike sisdoaluide

Bivdet ON:s veahki bissehan dihte ođđa Deanu soahpamuša

Ohcejot guovllu guolástangottit ja Deanu guolástanhálddašeapmi ovttas sámedikkiiguin ja gielddaiguin bivdet ON álgoálbmotrapertevrras veahki bissehit ođđa Deanu soahpamuša. - Duođalaš vuoigatvuođarihkkun, jos soahpamuš dohkkehuvvo.

Áššis muitalii vuosttamužžan Ávvir (siirryt toiseen palveluun).

Duorastaga 16.2. beaivaduvvon reivves čujuhit duođalaš vuoigatvuođarihkkumin go ođđa soahpamuš ráddje árbevirolaš bivddu, ja rihkku guovllu sápmelaččaid kultuvrralaš ja opmodatrievtti gáddái. Soahpamuš ii maiddái namut sámi bivdorivttiid.

Nubbi masa čujuhit, lea go sápmelaččat eai leat beassan albmaláhkai oassálasttit stáhtaid gaskasaš šiehtadallamiidda. Nu vaikko oasusgottiin ja sámedikkiin ledjege ovddasteddjit ráđđádallangottiin.

Reivve leat vuolláičállán Veahčaknjárgga, Njuorggáma, Vuovdaguoikka ja Ohcejoga kirkosiidda osolašgottit, Ohcejoga guolástanguovlu, Deanučázádaga guolástanhálddahus, Ohcejoga ja Deanu gielddat, Suoma ja Norgga beal sámedikkit ja Sámeráđđi.

Váidojuvvon máŋgii

Sihke árbevirolaš bivddu ráddjen ja stáhtaid ráđđadallanvuogit leat suhtadan báikki olbmuid das rájes go soahpamušárvalus geasset almmuhuvvoi.  Stáhtat leat ákkastallan bivdoráddjehusaid guollenáli dorvvasteamiin.

Suoma bealde leat guolástanvuoigatvuođaid eaiggádat čállán máŋggaid váidagiid mat gusket nu soahpamuša ráđđádallanvugiid go ráđđádallanbohtosage.

Deanu soahpamuš lea dál Suomas riikkabeivviid vuođđoláhkaváljagotti gieđahallamis. Ášši lea fas váljagotti ihttáš čoahkkima áššelisttus.

Maiddái Norgga stuorradikki energiija- ja biraslávdegoddi galgá gieđahallat soahpamuša dán vahkus.

Ođđasamosat