Njuike sisdoaluide

Ohcejoga márkan lea guorranan ja turisttat jávkan – "Jos mii livččiimet Fránskkas, nu dáppe sáhtášedje viehka stuimmit jo"

Fitnodatdoallit Ohcejogas leat heađis, go guolleturisttat leat ballán Deanu ođđa guolástanráddjehusain ja vuolgán eará jogaid ala bivdit.

Uulan säästö -gávppi fitnodatdoalli Uula Tapiola lohká, ahte Deanu ođđa guolástansoahpamuša váikkuhusat oidnojit jo guolleturismmas. Govva: Ville-Riiko Fofonoff / Yle

Deanu guolleturismmas dát ja boahtte vahkku galggašedje geasi garrasamos vahkut fitnodatdoalliide. Dábálaččat dán muttus áiggi buot hyttat leat láigojuvvon ja joga alde oidnojit dievva fatnasat vuodjimin.

Dál goittotge illá dihtto, ahte guolástanbadji lea rahppon turismabivdui geassemánu 10. beaivve. Moadde biilla vuojášit márkanis ja Uulan Säästö -gávppi šiljui lea parkeren okta ássanvovdna. Fitnodatdoalli Uula Tapiola šuohkkiha.

– Dat gal lea danláhkai ahte dat gal leat áigumin heaitit dan turistabivddu.

– Mun dajan, ahte 30-40 proseantta váilot oastit. Lohpeoastit gal váilot eamboge vel, mun jáhkán dat gal lea várra 60 proseantta vehát dál.

"Ii dat ná gal lean galgat mannat"

Nubbi fitnodatdoalli, Petteri Valle, duođasta Tapiola čuoččuhusa.

– Gal dat leat duođai unnán geat leat boahtán guolástit, dálge doppe joga alde jo geahččá de eai doppe leat gal fatnasat, Valle lohká.

Govva: Ville-Riiko Fofonoff / Yle

Petteri Valle lea aiddo huksen ođđa hotealla Deatnogáddái ja son lea ovdal dárbbašan máŋga veahkki suhkat fatnasiid turisttaide.

– Mis ledje ovdal 15 fatnasa, dán muttus áiggi galge leat buot joga alde. De dál eai leat go golbma fatnasa. Die lea, go smiehttá daid proseanttaid man olu lea jávkan.

– Galhan dat ii leat somá gal dieđusge. Ii dat ná gal lean galgat mannat. Dalle hálle, ahte goalmmátosiin galggašii čuohppat nugo dan heailla bivddus ja dalle mun álggu rájes jo dadjen go gullen, ahte dat lea eanet. Dat eai jáhkkán mu ja dál dat lea 70-80 proseantta, Valle lohká.

"Guolásteaddjit leat mannan Duortnosjoga ala bivdit"

Uula Tapiola oaivvilda, ahte turisttat leta jávkan Deanu alde ođđa čávgasot guolástanráddjehusaid dihte, ja dollen baicca Duortnosjoga alde.

– Turisttat, dat leat mo mun lean gullan, dat leat mannamin dohko Duortnosjohkii. Ja doppe leat buot báikkit dievva olles geasi, buot hyttat ja láigofatnasat, Tapiola dadjá.

Čearretsullui lea mannan vahkus ásahuvvon moratorio, mainna vigget bissehit Deanu soahpamuša fápmuiboahtima goit Čearretsullo lahkosiin Ohcejogas. Tapiola mielas dat lea buorre vuohki čájehit miela.

– Mun gal lean duđavaš diekkárii, ahte ii das leat eará vejolašvuohta. Dat lea áibbas riekta, ferte monu álgit doaibmat.

Son ii imaštalašii, jos soames válddášii atnui vel garrasutge vugiid.

– Jos mii livččiimet lean doppe váikko Fránskkas, nu dáppe sáhtášedje viehka stuimmit jo, Tapiola loahpaha.