Miss Suomi Alina Voronkova: "Minuu pahoi riäzitettih, sendäh gu hyvin pagizen ven’akse”

Kaksikielizen perehen tytärdy Pertunmualpäi kiuzattih školas ven’alažuon täh. Nygöi Miss Suomi Alina Voronkova tahtos, gu kiuzatut rohkiembah saneltas omis muokkavuksis. Se avvuttas estämäh kiuzuandua školas.

Yle Uudizet karjalakse
Miss Suomi 2018, Alina Voronkova, Puoli seiskan studiossa
Susanna Laine / Yle

Valgeitukku čoma 23-vuodehine neidine Alina Voronkova voitti vuvven 2018 Miss Suomi -kilvas. Puoli seiččie -programmas kerras ezmässargen gostih tulluh Miss tahtoi sanella školakiuzuandah näh kaikile.

– Školashäi läs jogahistu lastu riäzitetäh libo kai muokatahgi. Minuu pahoi riäzitettih, sendäh gu pagizen hyvin ven’akse. Tahtozin, gu kai kiuzatut saneltas omis kogemuksis. Segi avvuttas estämäh kiuzuandua ielleh.

Somebauhu ven’alazes nimes oli jo ennepäi arvattu, ga yhtelläh se hämmästytti.

– Negatiivižus nikelle ei ole mieldy myöte. Konzu lähäzet, pereh libo omahizet tahtotah panna hindua minulleni, otan sen vagavah, ga muut voijah duumaija, midä vai tahtotanneh.

Ven’alpäi syömiskul’tuurua da uskomustu

Kanzoinvälizenny koufeipäivänny Alina Voronkova tunnusti, gu kuun kestänyön Miss Suomi -kilvan jälles čuaškaine koufeidu randuteloin n’okas kodoilas Pertunmual olis paras dielo.

Yhtelläh tuatan muamalluo Piiteris ainos taritah čuajuu.

– Čuajuu algusyömizenke, čajuu piäsyömizenke dai jälgisyömizenke sežo čuajuu.

Ven’alazes syömiskul’tuuras Voronkovale enäm mieldy myöte ollah saluatat majonezanke.

Tuatan perindyö ollah eriluaduzet uskomukset. Ezimerkikse pualikkupordahien al ei sua astuo.

– Jygei dielo oli, konzu viruin lattiel da tuatto tuli da pöllätteli astundal minun yliči. Ven’al uskotah, gu pieni ristikanzaine enämbiä ei kazva, ollou ken hänen yliči astunuh.

Kitain pakkazet ijäkse mustoh

Alina Voronkoval on jiäkur’oih kižuaju mielespiettävy. Joona Hurri nygöi kižuau Japounies, ga puaru on elänyh sportulajin täh Kitaisgi.

– Ijäkse on jiännyh mustoh se matku. Puoli vuottu Harbinas tundui kui kolme vuottu. Pakkaskuul pakkastu oli -48 da ilman luadu oli paha.

Elostu sie vaigevutti se, gu anglien kieli ei avvutannuh.

– Kundozualuagi ečiin silloi varmah nedälin, sendäh gu niken ei ellendännyh angliekse.

Alina Voronkova uskaldau olla moine Miss Suomi, kuduah voit kebjieh lähestyö.

– Ihan välläh da kebjieh. Hyväl mielel luajildan minuškan dai meijäškängi.

Alina Voronkovaa kiusattiin koulussa, koska hän puhui sujuvaa venäjää. Nyt Miss Suomi 2018 haluaa panna stopin koulukiusaamiselle.

Yle Uutiset: Miss Suomi Alina Voronkova: "Minua kiusattiin, koska puhun sujuvaa venäjää"