Luonnonmugazien syömizien myöndy kazvoi ruttoh – markinuvuitti iellehgi ei ylen suuri

Luomusyömizis da -juomizis puaksumbah ostetah banuanua, vähärazvahistu maiduo da jauholihua.

Yle Uudizet karjalakse
luomumunia kennossa
AOP

Luomusyömizien da -juomizien myöndy on ruttoh kazvamas Suomes, nenga sanou luomualan kehitysty da kazvuo edehpäi eistäi Pro Luomu.

Mennyt vuvven keskivälis tämän vuvven keskivälissäh 12 kuun aigua luomueloitarvikkehii myödih 312 miljonan eurol. Tämä miäry on 13 prosentua enämbi, migu enne sidä samazel aiguvälil.

Jogapäiväzien tavaroin kuluttajilemyöndy kazvoi samazel aiguvälil läs kolmel prosental. Arvivo luomutuottehien myöndäs pohjavuu jogapäiväzien tavaroin laukoil kerättylöih čotaičendoih. Luomun markinuvuitti nygöi on 2,3 prosentua.

Suomen luomumarkinat ollah alalleh kazvettu kogo 2010-luvun aigua. Vuvves 2011 luomun myöndy laukois on nossuh läs 90 prosental. Myöndän kazvandua on eistänyh edehpäi luomutuottehien assortimentan suurenemine.

”Kazvopotensiualua äijy”

Luomutuottehis suomelazet ostetah euromiärähizeh enimite fruktua, maiduo, kazvostu, kananjäiččiä da koufeidu. Yksittäzis luomuproduktois suvaijah enämbäl banuanoi, vähärahvahistu maiduo, kananjäiččiä da jauholihua.

Korgevimat markinuvuitit Luomul ollah siemenvoin da kananjäiččien produktujoukkolois, kudamis luomun oza on läs viijesvuittii myöndäs. Luomu hyvin myöy sežo lapsiensyömizien sego hiudalehien da suurimoin joukkoloih kuulujii produktoi, kudamis luonnonmugazien tuottehien markinuvuitit ollah nenga seiččemesvuitti.

Pro Luomun toimindanjohtajan Marja-Riitta Kottilan mugah luonnonmugazien tuottehien myöndäl on vie äijy kazvopotensiualua.

– Luomu on mieldy myöte enimite nuorile kuluttajile, sendäh voimmo vuottua kyzyndän kazvuo tuliel aigua. Nuoret ostetah luomuu enne kaikkie ymbäristöh, hyvinvoindah da elättilöin ololoih yhtyjien syylöin täh, nenga sanou Kottila järjestön tiijoittehes.

Yle Uutiset: Luomuruoan myynti kasvoi reilusti – markkinaosuus edelleen vaatimaton