Erähät suomen sugukielet kuoltah teriämbäh duumaittuu

Vengrielaine kielitiedomies János Pusztay on sidä mieldy, gu suomelas-ugrilazii kielii vuottau jygei tulii aigu. Enzimäzinny hävitäh vad’d’an, liivin da enecin kielet.

Yle Uudizet karjalakse
Mordvalaisia naisia kansallispuvuissaan.
Mordvalaisia naisia kansallispuvuissaan Zubussa.Numulunj pilgae / Wikimedia Commons

Professoru János Pusztay on aijembagi hämmästytännyh pahoil ennustuksil, ga nygöi hänen mieles dielot ollah pahua pahembat. Häi sellittäy sen mordvalazien ezimerkil.

– 30 vuottu tagaperin heijän lugumiäry oli 1 200 000. Silloi mordvalastu oli enämbi, migu virolastu. 2000-luvun alguvuozinnu mordvalastu oli jo 800 000. Sanon, gu tämän vuozisuan loppussah heijän miäry vähenöy vie 200 000:l, arvivoi kielitiedomies Pusztay Radio Suomen Päivän pagizuttelus.

Pusztayn mugah nuoret opastunnuot da linnas eläjät rahvas ei enämbiä olla äijäl kiinnostuttu kieles.

– Vahnu sugupolvi vie pagizou omah kieleh, ga konzu se lähtöy, senke lähtöy kieli da kul’tuuru. Sen-tämän vuvven peräs nenga hävitäh ezimerkikse liivin, vad’d’an, enecin da nganasanan kielet. 20 vuvven mendyy kavotah hantin da mansin kielet. Pahakse mielekse kuva on ylen atkalannägöine.

Ven’an kielen korostamine ajau iäres muut kielet

Äijih suomelas-ugrilazih kielih paistah Ven’al. Sie kaikkien alguperäzien rahvahien tilandehtu heikendäy mulloi alganuh valdivolline kampuanii, kudaman tarkoituksennu on lujendua ven’an kielen azemua opastukses.

Kielitiedomiehen János Pusztayn mieles yksi libo kaksi čuassuu muamankieldy nedälis ei tävvy.

– Pagin ei ole sit, äijygo čuassuu kieleh opastetah. Kieli pyzyy vai sit, konzu muidugi urokkoi, kui ezimerkikse matematiekkua da fiiziekkua, pietäh muamankielel.

Pusztayn mugah valdivo garantiiruiččou opastustu vaigu ainavol valdivon kielel – ven’an kielel.

– Da se merkiččöy muile kielile surmua.

János Pusztay on ruadanuh paiči muudu yliopiston suomelas-ugrilazel laitoksel Budapeštas da Szombathelyin opastajanopastuslaitoksen rehtorannu sego perustannuh sinne uralistiekan laitoksen.

Piäl 60 oman julgavon ližäkse Pusztay on toimitannuh enäm 300 tevostu. Luvetteloh kuulutah sežo sanakniigat, kudamien tarkoituksennu on kebjendiä školaopastustu pienil kielil.

Yle Uutiset: Suomen sukukieliä kuolemassa oletettua nopeammin