N’orpu sai dengua enämbän muidu – Tuuliaizen fondu tugi suomelazii luondoprojektoi 600 000 eurol

Muut fondan tuvel vardoittavat elättilajit ollah jogihelmihavvinkukkaroine, jogiruakku da valgeiselgytikku.

Yle Uudizet karjalakse
saimaannorppa kivellä
Ismo Pekkarinen / AOP

Suvi-Karjalas Lemil ruadai Raija da Ossi Tuuliaizen fondu mulloi on andanuh kaikkiedah 600 000 euruo tuvekse riistanhoidoh, elättilöin vardoičendah da elättilöin eloksenololoin parandamizeh niškoi.

Läs puolet kaikis dengois käytettih elättilöin vardoičusprojektoih.

Suurin yksittäine abudengu oli 110 000 euruo, da se annettih saimuann’orpan vardoičendah.

Muut Tuuliaizen fondan tuvel vardoittavat elättilajit ollah jogihelmihavvinkukkaroine, jogiruakku da valgeiselgytikku.

Saimuan mikroplastiekku yhtenny tutkimuksen kohtannu

Tugie annettih sežo Saimuan mikroplastiekkutilandehen da vieraslajien sellittämizeh.

Kaikkiedah 70 000 euruo suadih moizet projektat, kudamis tutkitah rakendettuloin kosteikkoloin merkičysty eriluaduzile elättilajiloile sego pannah kundoh kalakannoin eloksenololoi Kivijärvel, Jängynjärvel da Puruviel.

Fondan omistettavien vardoittavien meččien pindualua mulloi ližättih 30 hehtuaral. Vardoittavua meččiä nygöi on sada hehtuarua.

Ližäkse fondu tugi suomelazien luondofil’moin da -kniigoin luajindua kaikkiedah 120 000 eurol. Abudengukohtinnu oli 10 mostu da niilöis enimite kuvatah Saimuan alovehen luondoelostu.

Abudengukohtih kuuluttih sežo lapsien da nuorien luondokerho- da eräluageriruandu.

Norppa sai eniten rahaa – Tuuliaisen säätiö tuki suomalaisia luontohankkeita 600 000 eurolla