50-metrizen puuhizen kerrostaloin nostandu on olluh suuri ruado – Jovensuus terväh roih valmis yksi Pohjazien mualoin korgiembis puutalolois

14-kerroksine opastujientaloi pidäs olla valmis elokuul.

Yle Uudizet karjalakse
Puukerrostalo
Penttilänrannan puuhizen kerrostaloin ulgopinnas roih kivine piälysteh.Heikki Haapalainen / Yle

Penttilänrannan puuhine kerrostaloi ruttozeh on nossuh Jovensuus. Se roih Suomen da Pohjazien mualoin korgevin taloi, kuduan rungo on srojittu puus. Kai lifturakendehet on luajittu puus. Norjan Brumunddaliin on rakenteilla (siirryt toizeh palveluh) (siirryt toiseen palveluun) Norvegien Brumunddalan piäl 80 metrin korgei taloi mugaže on srojittu enimite puus. Toven taloin ylimäzis kerroksis on käytetty sežo betonua.

Vuozi tagaperin opastujienfatieruyhtivön Jovensuun Ellin toimitusjohtai Jarmo Ojalainen kritikuičči projektua kallehuon täh. Planiiruittuu kallehemban srojindan täh pidi ruveta siästämäh ezimerkikse materjualois da jiähtytykses.

Arhitektoru da taloin planiiruiččii Samuli Sallinen omas puolespidäy läs 50 metrii korgien puutaloin planiiruičustu suurennu a jygiennygi ruavonnu.

- Ečiimmö äijän pluanan kauti parastu pohjumuoduo taloile, gu sen nostandu ei maksas liijan äijän. Tiettäväine srojindupiätökset da paloturvalližus tuvvah äijän ruaduo, sendäh gu Suomes ei ole mostu taloidu aijemba nostettu sanou häi.

Penttilänrannan uvves korgies talois roih 117 fatierua, da niilöis 91 yksipertisty sego 26 kaksipertisty.

Puu pidäy pidiä kuivannu

Puutaloi on nostettu ihan kuivannu. Se merkiččöy, gu puuelementoi ei ole azetettu vihmažal siäl da srojimizen aigua taloin piäl ainos on olluh väliaigaine vihmas vardoiččii levo.

- Suurin dielo on se, gu taloin runguo ei pidänyh kuivata sen nostamizen jälles. Sanakse, betonas luajittuloi taloloi läs ainos pidäy kuivata, sanelou rakendustoimiston Eero Reisozen vastuaju muasteri Jukka Timonen.

Stora Enso omas puoles on tuonnuh taloh tarvittavat puuelementat.

- Seinyelementat ollah fanierua libo LVL:iä, kudamua varustetah Varkaukses. Lattien välipohjan elementat on azuttu CLT:s, kudamua luajimmo nygöi Austries, sanou Stora Enson kehityspiälikkö Antto Kauhanen.

14-kerroksine opastujientaloi pidäs olla valmis elokuul.

50-metrisen puukerrostalon rakentaminen on ollut haastava urakka – Joensuuhun valmistuu yksi Pohjoismaiden korkeimmista puutornitaloista