Algunedälin yöt ollah vilut, ga nellänpiän roih muutos – piätteniččän toinah kai +10

Algunedälil kevätty vie ei muga nävy, ga jo nellänpiän roih äijiä lämmembi.

Yle Uudizet karjalakse
Alkuviikon sää.
Yle Sää

Alganuh nedäli on vilu kolmahpäivässäh, ga sit kai yölöilgi roih äijiä lämmembi.

– Nedälin ilmu jagavuu kahteh: vilumbah da lämmembäh, sanou Ylen meteoroulogu Toni Hellinen. Kolmahpäivässäh pyzyy päivypastoine, ga viluttavu ilmu, yölöil kai ylen vilu dai pakkastugi voibi olla. Viluvin yö on kolmanpäivän vastaine yö.

– Sit vie pakkastugi on kai suves kymmeniene astehtu, jatkau Hellinen.

Ei ni päivy ole yödy äijiä lämmembi: ezmässargen muan suves da keskičuris ei ole enämbiä viitty astehtu lämmiä da Lapis nenga viizi astehtu pakkastu. Tossargen on yhty libo kahtu astehtu vilumbi.

Kolmaspäivy on tämän nedälin kaikkii toizii päivii vilumbi, konzu suvesgi ei rodei enämbiä viitty astehtu lämmiä da keskičuris toinah kahtu. Toizielpäi ihan pohjazes rubieu lämbenemäh, konzu lämminilmu tulou päivänlaskupuolespäi da lämbötila nouzou nol’assah.

– Nellänpäivän vastazel yöl siä muuttuu. Yöl vie toinah roih pieni pakkainegi, ga päiväl ilmu lämbenöy.

Hellizen mugah piätteniččy on jo ihan oigei kevätpäivy.

– Eihäi sua sanuo ihan tarkah, ga suves voibi lämmetä kai kymmeneh astehessah. Pohjazesgi roih nol’an puolel libo toinah nenga viizi astehtu lämmiä.

Alkuviikon yöt ovat kylmiä, mutta torstaina kaikki muuttuu – perjantaina jopa 10 plusastetta