Päivännouzu-Suomen mečis kerättylöis sienis da grivois piäl miljonan euron – enäm dengua toi valgei griba

Läs 90 prosentua kaikis myödylöis sienis da grivois kerättih Päivännouzu-Suomes.

Yle Uudizet karjalakse
Herkkutatti ihmisen kädessä.
Suurin vuitti Suomes myödäväkse kerättylöis valgielois grivois viijäh ulgomuale, puaksumbah Italieh.Paavo Häikiö / Yle

Siendy da gribua myödäväkse keriäjät mulloi suadih piäl miljonan euron Päivännouzu-Suomes. Tämä dengumiäry on enäm kahtu kerdua suurembi, migu oli ennemullostu.

Enäm muidu myödäväkse kerättih valgiedu gribua, kuduadu pietäh tärgiedy viendygrivannu. Valgielois grivois gribaniekat suadih nenga 800 000 euruo. Kogo muas valgiedu gribua tuli myödäväkse vajuat 275 000 kiluo libo äijiä enäm, migu mennyt vuon.

Suurin vuitti myödäväkse kerättylöis valgielois grivois viijah Suvi- da Keski-Eurouppah, puaksum muidu Italieh.

Toizis sienis huabupilvoidu kerättih myödäväkse 62 000 kiluo da kangaspilvoidu 23 000 kiluo. Keldusiendy ei olluh äijiä da niidy rubei kazvamah tavanmugastu nedälilöi myöhembä. Keldusiendy suadih poimiččuloih vajuat 16 000 kiluo da läs kai niilöis oli kerätty Päivännouzu-Suomes.

Nenga 90 prosentua kaikis myödäväkse tulluzis luonnonsienis da grivois kerättih Päivännouzu-Suomes. Kuivus hätkestytti mulloi sienien da grivoin kazvandua, ga toizielpäi sieni- da griba-aigu pitkeni jällespäi.

Itä-Suomen metsistä sieniä keräämällä yli miljoona euroa – herkkutatti toi suurimman osan rahoista