Äijähpäivässäh ilmu on tavanmugastu lämmembi – nellänpiän lämmiä roinnou +17

Tuliet päivät roitah lämmembät, migu täl aigua tavan mugah, ga yölöil roih vilu.

Yle Uudizet karjalakse
säägrafiikka
Yle Sää

Päivypastoine da tavanmugastu lämmembi ilmu jatkuu iellehgi Äijähpäivässäh. Tossargen ollou olluh kaikkii lämmembi päivy, midä tässäh tänä keviän on olluh. Salos ildupuoleh nenga kolmen jälles lämmiä oli 16,1 astehtu. Se on keviän ylin lugemu.

Kolmanpiän muan päivänlaskučuris voibi roita 15 astehtu lämmiä, erähis kohtis enämbigi. Muan päivännouzuspäi pohjazeh menijäl alovehel on vilumbi da ylä- sego keskipilvežys on suuri.

Nellänpiän lämbötilat vikse nostah iellehgi, da muan päivänlaskučuris lämmiä roih toinah kai 17 astehessah. Päivännouzupuoles da pohjazes päiväine rubieu pastamah enämbäl, migu kolmanpiän.

– Äijänpäivän nedälinlopul enimis kohtis rubieu päiväine pastamah, sanou Ylen meteoroulogu Joonas Koskela.

Nedälinlopul roih vähästy vilumbi, migu nedälil.Pohjazes Suomes pyhänpiän vikse roih vihmu. Sežo nellänpäivän da piätteničän välizel yöl pohjazes voibi vähäzel vihmuo.

Tämän aijan tavanmugazet korgevimat lämbötilat suvizes Suomes ollah 8 astehen mail, ga tänä keviän ilmu on lämmembi. Yhtelläh tuliet yöt ollah vilut.

Kuivan siän täh Ahvenanmual da Varzinas-Suomes voimas on heinänpalovakustus.

Tavanomaista lämpimämpi sää jatkumassa pääsiäiseen asti – torstaina lämpötila voi hipoa +17 astetta