Tundrureboit oldih jo häviemäs Skandinavies – nygöi tunduriloilpäi tulou hyviä viestii

Ruočin da Norvegien tundurialovehil nygöi eläy vähimyölleh 400 tundrureboidu. Suomes jälgimäine poigoveh nähtih enäm 20 vuottu tagaperin.

Yle Uudizet karjalakse
Naali
TundrureboiAOP

Ruočin da Norvegien tundurialovehilpäi tulou hyviä viestii varavonalazen tundrureboin dielolois. Uvvemban čotaičendan aigua nähtih 300 aiguhistu da sada poigastu, sanou Ruočin Radivo Ruotsin radio (siirryt toizeh palveluh) (siirryt toiseen palveluun).

Vie vuvvel 2000 samazel alovehel tundrureboidu oli vaigu läs 60.

Tundrureboloin miäry on suadu kazvamah moizen projektan vuoh, kudamal pyrritäh turvuamah eloimahtot viemäl tundurialovehile ravinduo da tappamal ruskieloi reboloi, kuduat ollah tundrureboloin luonnollizet vihažniekat.

Suomesgi ylen varavonalazen tundrureboin ololoi opitah parandua ližäsyöttämizen da reboinmečästyksen vuoh. Luondojärjestön WWF:n mugah (siirryt toizeh palveluh) (siirryt toiseen palveluun) jälgimästy kerdua Suomes nähtih poigoveh vuvvel 1996.

Naalit olivat jo katoamassa Skandinaviasta – nyt tuntureilta kuuluu hyviä uutisia