Terväh räkkie ei rodei – Päivänlaskupuoles vie on lämmembi, ga tossarren jälles ilmu vilustuu

Päivänlasku-Suomes tänäpäi voibi olla räkki, kui egläigi.

Yle Uudizet karjalakse
Auringonottajat nauttivat hellepäivästä uimarannalla Oulussa.
Ezmässarren da tossarren aigua voibi olla vie räkki.Eija Kontio / Lehtikuva

Mennyön nedälinlopun aigua räkki oli kogo Suomes. Räkembi tavanmugastu pyhänpiän oli 20 paikkukunnal Varzinas-Suomespäi Pohjas-Pohjanmuale suate.

Keviän lämmänrekordu egläi miärättih Poris da se oli 27,2 astehtu.

Räkki siä pyzyy vie ezmässargen da tossargen.

– Lämmin ilmumassu painahes suveh, da juuri päivänlaskupuoles ongi räkembi, sanou Ylen meteoroulogu Jesse Heikkilä.

Heikkilä sanou, gu tänäpäi Päivänlasku-Suomes voibi olla läs mugaže räkki, kui egläigi.

– Ezmässarren ehtän da tossarren yön aigua Päivänlasku-Suomes voibi vihmuo da jyristä, mi roih lämmän siän da ilmanke tuovun kostevuon yhtehizes vaikutukses.

Päivännouzupuoles da pohjazes on pilvežembi da sendäh lämmiägi roih nenga 15–20 astehtu.

Terväh siä muuttuu vilumbakse

Yhtelläh tossarren jälles siä muuttuu.

– Pohjazespäi tulou vilumbua ilmua, kuduan täh siä muuttuu tämän vuvvenaijan tavanmugazembakse.

Heikkilän mugah tossarren jälles suves roih nenga 20 da pohjazes 10 astehtu lämmiä.

Nauti helteistä vielä kun voit – Lämpimintä lännessä, tiistain jälkeen sää viilenee