Ostoyhtivö: Kuivan kezän buolat ollah hienot da erähät vie ruohkatgi, siendy da gribua vähä

Buolua jo äijät kerätäh, ga eibo muarjat olla karjat. Siendy da gribua päivännouzučuran mečis löydyy vähä.

Yle Uudizet karjalakse
Puolukoita sangossa.
Nengomua karjua buolua harvu muarjuniekku on kerännyh tänä sygyzyn Pohjas-Karjalas.Paulus Markkula / Yle

Kezän kuivus nygöi nägyy Pohjas-Karjalan buolusualehes.

– Buolat ollah erähis kohtis kangahil moizet hienot, ga kai mennäh net läbi poimičus, sanou toimitusjohtai Marja Päivänurmi meččymuarjua ostajas Jovensuun Tuote ja Vihannes -yhtivöspäi.

Parembastu karjembua buolua nygöi löydyy märrembis kohtis.

Päivänurmen mugah buolu ei ole vie ihan kypsy.

– Mulloi kylmykuul buolusualis muakunnas oli vie pahembi, nygöi yhtelläh on parembi. Ga keviän ennustehet buolan äijyös ei todevuttu, tovendau luonnontuotehyhtivön toimitusjohtai.

Jovensuulaine muarjufirmu maksau sellitettylöis buolis kaksi euruo kilos. Valmehekse survotun buolan hindu on samaine.

Meččii myöte kävelijöin sieniniekoin da gribaniekoin poimičut ei olla täčöitävvet. Myödäväkse tulou vie vähem siendy da gribua.

– Ei äijiä sienien da grivoin myöjiä tiä nägynyh. Mingi verran pilvoidu, vähäine keldusiendy da kudamidägi gribua da ylen vähä suppilovahveruo, luvettelou Päivänurmi.

Arvokastu macutake-siendy ei vie ole jovensuulazeh firmah tulluh ni yhty.

Marja Päivänurmi pidäy sieni- da gribavuottu pahannu. Yhtelläh häi toivou, gu syödäväkse pädijöin sienien da grivoin šliäppäzii rubies vie nägymäh lähinedälilöin aigua.

Ostoyhtiö: Kuivan kesän puolukat ovat pieniä ja vielä osin raakoja, sienisato kehno