Suomelaine Lego-johtai: ”Minun lapsusaijan Lego-juaššiekas joga palikkoine on ruokos”

Dizainujohtai Zina Kranck toivos, gu kai pereh yhtys Lego-srojindah.

Yle Uudizet karjalakse
Legoja
Carolina Husu / yle

Toine toizeh kiinnittyjät, erikogozet plastiekkupalikot ollah oldu lapsien dai aiguhizien ilokse jo vuvves 1949 algajen.

Lego-palikkoloi suvaijah vikse sendäh, gu net ollah aijattomat, kerran vuozikymmenii täyttänyöt vahnat palikkozet sovitah uuzihgi Lego-palikkoloih.

– Minun lapsusaijan Lego-juaššiekas on joga palikkoine vie ruokos. Minun lapsetgi ollah srojittu niilöis da jälgivuozien aigua juaššiekkah on tulluh ližiägi Lego-palikkuo, sanou azientundii Zina Kranck Radio Suomen Päivä -programman pagizuttelus, kuduan lövvät täs: Radio Suomen Päivä -ohjelman haastattelussa.

Suomelaine Zina Kranck on danielazen Lego Groupan tuotehgrafiekan da materjualuozaston dizainujohtai. Hän ei usko, gu lapsien mielikuvituksele oldas pahat Legon tavanmugazet srojimissarjat, kudamis on valmehekse srojinduohjavo.

– Lego-srojindu kehittäy lastu, da sih kuuluu opastundu äijih maltoloih samazel aigua, sanou Kranck.

– Jogahine Lego-vakku sanelou mingi starinan. Ezimerkikse Star Wars -laivu on vakas vuittipalikkoloinnu, da niilöis srojit sit ohjavon mugah sen. Toivehennu olis, gu laivu riičittäs da uvvessah srojittas libo luajittas vuittipalikkolois midägi muudu, sanou Kranck.

Dizainujohtai vakustau, gu Lego-srojindu ei ole ainos kebjei dielo.

– Tärgei on, gu ezimerkikse vahnembat oldas srojimas yhtes lapsienke. Toiči lapset lamevutah sendäh, gu mitah srojimissarju ongi liijan jygei. Yhtelläh tärgei on mustua, gu kaksigi palikkostu yhtes on jo kudamidägi. Sehäi voibi olla hos lendokoneh libo mitah hirvei olendo, ollou sil silmät.

Zina Kranckal kois pualičal on iččeni Legon keräilyharvinažus. Sidä häi ei tahto riiččie eigo ni srojie uvvessah.

– Neče on Lego Kleinbus. Konzu rahvas nähtäh sen, ainos suan heis kommentua.

Suomalainen Lego-johtaja: ”Lelujen myynnin siirtyminen verkkoon oli yllätys"