Jo seiččemetty kerdua peräkkäi Yle Areena on Suomen kaikkii arvostetumbi verkobrendu – ”On eduoigevus suaja olla vuitinnu midätah mostu merkičyksellisty”

Yle da Elävä arkisto sežo synnyttih kymmenen parahan joukkoh.

Yle Uudizet karjalakse
Matkapuhelin kädessä. Puhelimen näytöllä Ylen kuukausikirje.
Läs 80 prosentua tutkimuksen ozanottajis sanoi, gu kaččou Yle Areenua vähimyölleh silloi-toiči. Jussi Nahkuri / Yle

Yle Areena on suomelazien kaikkii enämbäl arvostettu verkobrendu. Tämä tiijustettih Talovustutkimuksen todevutetus tutkimukses.

Suomelazien brendoin joukos Areenan enzimäine sija oli jo seiččemes peräkkäi. Kaččonemmo kui kodimualazii mugai ulgomualazii verkobrendoi, ga täs Areena on parahal sijal jo tostu kerdua.

– Meile kaikis tärgevin on suomelazien arvostus. On suuri kunnivo, gu suomelazet vietetäh omua kallistu aigua meijän palvelus. Se inspiriiruiččou meidy kehittämäh Yle Areenua endisty parembakse. On eduoigevus suaja olla vuitinnu midätah mostu merkičyksellisty, sanou Areenan programmupiälikkö Cilla Lönnqvist.

Tutkimuksen mugah kai 92 prosentua suomelazis tiedäy Areenan brendan. Läs 80 prosentua käyttäy Areenua vähimyölleh silloi-toiči.

Areena oli enzimäzel sijal sežo palvelun käyttäjien arvostustu sellittäjes.

Tutkimukses arvivoittih 150 tundietumbua kodimualastu da ulgomualastu verkobrendua. Kymmenen parahan joukos oli Ylelpäi iče Yle sego Elävä arkisto. Net puututtih sijoile kuuzi da seiččie.

– Ylen moine hyvä lykky sanou uskomizes meijän syväindöh. Ilo on tiediä, gu kaččojat da kuundelijat löytäh Areenas heile mieleh olijua programmua, fil’mua da muudugi juuri heile pättäväh aigah. Ylen brendan da Elävän arkiston arvostus tuou meile äijän iluo da se sanou, gu lykystyimmö julgizen palvelun mediennu, iloičeh toimitusjohtai Merja Ylä-Anttila.

Toizele sijale tutkimukses piäzi Ilmatieteen laitos da kolmandele Kansallisen terveysarkiston Kanta.fi.

Talovustutkimuksen Oy:n todevutetun Verkobrendoin arvostus da nevvondu Suomes 2019 -tutkimuksen tarkoituksennu on sellittiä verkobrendoin kuulužuttu, arvostustu da nevvondutahtuo suomelazien internetan käyttäjien keskes. Verkobrendoin arvostustu on tutkittu vuvves 2001 algajen.

Yle Areena on seitsemättä kertaa peräkkäin Suomen arvostetuin verkkobrändi – "On etuoikeus saada olla osa jotain näin merkityksellistä"

Nenga Yle on ozitunnuh mullozes tutkimukses:

Yle Areena päihitti Googlen ja WhatsAppin – se on arvostetuin verkkobrändi Suomessa