Äijät muuttolinnut jiädih Suomeh lauhkien algutalven täh

Tänä talven Keski-Pohjanmuale on jiännyh kai sada linduluaduu, ga nenga kaksikymmen vuottu tagaperin miäry oli piäl kahtu kerdua pienembi.

Yle Uudizet karjalakse
Kyhmyjoutsen poikasineen.
Tänä talven Suomeh on jiännyh sežo äijy joučendu. Ismo Pekkarinen / AOP

Ylen lauhkien pakkaskuun täh äijät muuttolinnut ollah jiädy talvekse sežo Keski-Pohjanmuale.

Enäm 40 vuottu linduloi kaččonuon, BirdLife Keski-Pohjanmaa -yhtistyksen ozanottajan Marko Pohjoismäen mugah nenga kolmekymmen vuottu tagaperin muakunnas talvie vietti 30–50 linduluaduu.

Jälgimäzien talvien aigua Keski-Pohjanmual on nähty kai enäm sadua linduluaduu.

– Onhäi se poikkevukselline muutos. Ilmoin lämmetes linduloin muutto hätkestyy libo kai kogonah estyy, kerran vezistötgi ollah avvoi, sanou Pohjoismäki.

Kuundele Marko Pohjoismäen kai pagizuttelu tiä.

Lämmin ilmu toi sežo uuttu pezindylajii

Tänä talven Keski-Pohjanmuale on jiännyh ylen äijy enimite vezilinduu, ezimerkikse koskeluo, telkiä da kuikkuagi, kudamii aijemba talvien aigua sie ei nähty.

Jouččeniigi tänä vuon on nähty kymmenii.

– Nygöi pakkaskuul keskilämbötila on olluh 5–10 astehtu korgiembi da sendäh nenga rodihgi. Lämmin ilmu segavuttau linduloin hormounat da se nägyy vähimyölleh tijazien, peiboloin, varoloin da harakoin ičenviendäs.

Pohjoismäki on huolevunnuh sit, gu pezindy voibi algua liijan aijoi, roinnou vie tuhu- da kevätkuulgi lauhkei ilmu.

– Nengoman siän täh pezindygi voibi algua. Tuldaneh poigazet liijakse aijoi da išköygi tagatalvi, ga sitbo vaste pahoi roih kai, miettiy Pohjoismäki.

Ilman lämbenemine on tuonnuh Suomeh jo sen-tämän pezindylajin Suvi- da Keski-Euroupaspäi. Vuvvennu 2018 ezimerkikse valgei haigari on pezinyh Suomes enzimästy kerdua.

Moni muuttolintu jäi Suomeen leudon alkutalven takia