Koirii piettih reduhizes klietkas da kudžut muokattihes vilus – Ižändy sai štruafut elättivardoičusrikokses

Koirien ižändy kiisti omassah viärytty rikoksis.

Yle Uudizet karjalakse
Päijät-Hämeen käräjäoikeuden kirjaston lakikirjat istuntosalissa.
Tapahtukses työttih äijy elättivardoičusilmoitustu.Emilia Malin / Yle

Koirii pahoi pidänyh mies sai nakazaaniekse štruafut Lapin paikallizes suvvos.

Suudo tovendi, gu mies on muokannuh koirii nengomal pahal pidämizel. Häi pidi koirii reduhizes kohtas, kudžuloile oli ylen vilu, emäčyle oli luajitettu kudžuloi liijan puaksuh da koirien lähäl oli hapannuttu syömisty.

Ižändy pidi omassah kolmie aiguhistu koirua samazes klietkas, erähät kudžut oldih koirienkohtas da erähät garažas.

Täs dielos työttih äijän elättivardoičusilmoitustu, mindäh elättilöinliägäri kolme kerdua kävyi sinne kaččomah koirii.

Koirien ižändy kiisti omassah viärytty rikoksis. Paikalline suudo hylgäi viärityksen järjestysrikkomukses, ga pani nakazaaniekse miehen elättivardoičusrikokses 25 päivyštruafun, kudaman mugah pidi maksua 300 euruo.

Suvvos kačeltu dielo koski Sallas vuozinnu 2017–18 olluttu tapahtustu.

Nakazaanii on suannuh zakonanvoiman, toizin sanoin, sit ei työtty žualobua ylembäzih oigevusastehih.

Koiria pidettiin likaisessa häkissä ja pennut kärsivät kylmästä – Mies sai sakot eläinsuojelurikoksesta