Kajuanin školis syömizet ollah Suomen parahii – školasyömiskilvan finualas viizi muudu linnua

Kajuani on keräl školasyömiskilvas enzimästy kerdua.

Yle Uudizet karjalakse
Inarin koulussa maistuu kouluruoka
Kajuanis školaniekat suajah ylen hyviä syömisty. Vesa Toppari / Yle

Kajuanin Mamselli on piässyh Suomen školasyömiskilvan finualah viijen muun suomelazen školanke.

Tarkembah sanojen kilvas on keräl Lehtikangahan monitoimitaloin yksikkö, kus varustetah syömisty kaikkih Kajuanin perusškolih da päivykodiloih niškoi.

Kaikkiedah Lehtikangahal joga päiviä luajitah nenga 5 000 annostu školasyömisty.

– Myö kuundelemmo školaniekkoi. Hyö puaksuh sanotah omii mielii varustettulois syömizis. Opimmo luadie mostu syömisty, kudai olis heile mieldy myöte, sanou Mamsellin syömispalveluloin palveluplaniiruiččii Taru Kemppainen.

Kajuanin Mamselli on enzimästy kerdua keräl valdukunnallizes školasyömiskilvas, kuduan finualu pietäh 11. kevätkuudu Gastro Helsinki -tapahtuman hantuzis.