Suvi-Savos tahtotah vähendiä ilveksien miäriä – Tänä talven kuattih 33 ilvesty

Tuhukuun lopus loppevunnuon mečästyskavven aigua Suvi-Savon mečis kuattih 33 ilvesty.

Yle Uudizet karjalakse
Ilves Ranuan eläinpuistossa.
Yle/ Seppo Nykänen

Tänä talven Suvi-Savos on kuattu 33 ilvesty. Muakundah oli annettu poikkevuslubua 39 ilveksen kuadamizeh niškoi tämän talven mečästyskavven aigua.

Suvi-Savos on pyrrittyhes pienendämäh ilveksien miäriä kannanhoijollizin perustehin. Tänä talven kuadolubua oli läs 10 enäm, migu mulloi talvel.

Mennyt kezäl luajitun jälgimäzen kanduarvivon mugah Suvi-Savos oli läs 240–250 aiguhistu ilvesty. Kaikkiedah niilöil roih nenga 50 poigovehtu vuvves, sendäh nygöi Suvi-Savon mečis voibi olla kai 300 ilvesty. Suvi- da Pohjas-Savon alovehel eläy enäm ilvesty, migu muijal Suomes.

Ilveksen mečästyskauzi algoi talvikuun allus da loppih tuhukuun lopus.

Ilvesty rodih enäm

Kogo Suomes ilveksen vuozisualis on suurennuh ilveskannan kazvandan myödäh 2000-luvun allun sit-täs kymmenes kai 400 kuattuh ilveksessäh. Arvivon mugah tänä talven ilvesty on kuattu kogo Suomes 200, konzu kuadolubua oli 230.

Valdukunnallizesti ilveskannan kazvandu suadih hillendämäh kolme vuottu tagaperin, min jälles kuadolubien miäriägi on vähendetty. Jälgimäzen kezän kanduarvivon mugah kogo Suomes on läs 2 000 ilvesty, kudamile roih joga vuottu kaikkiedah 350 poigovehtu. Yhtes poigovehes on keskimiärin kaksi poigastu.

Ilves on ainos rauhoitettu. Mahto mečästykseh roih Suomen riistukeskuksen annettavan poikkevusluvan vuoh.

Luba voijah andua ezimerkikse muun luonnon säilyttämizekse, talovusvahingoloin estämizekse libo ylehisty turvalližuttu duumaijen.

Ilvesten määrää halutaan vähentää Etelä-Savossa – Tänä talvena kaadettiin 33 ilvestä