Mennyt vuozi oli Euroupan miäriändyhistourien kaikkii lämmembi – Vuota räkkie sežo tänä vuon

Euroupan ilmastohistourien 12:s lämmembäs vuvves 11 on olluh 2000-luvul.

Yle Uudizet karjalakse
Mies vilvoittelee suihkulähteessä Berliinissä.
Mies viluškoittau iččie fontuanas Berliinas.EPA

Vuozi 2019 oli kaikkii räkembi Euroupas konzutahto miärättylöis, nenga sanou EU:n ilmastotiedopalvelu Copernicus.Tämä tiijustettih tiedopalvelun jogavuodizes European State of Climate(siirryt toizeh palveluh)-ilmastokačahtukses.

Mullozet keskimiärähizet lämbötilat oldih korgiembat, migu enne sidä vuozinnu 2014, 2015 ja 2018, sanou Copernicus.

Muanvuitin miäriändyhistourien 12:s räkembäs vuvves 11 on olluh 2000-luvun aigua.

Mulloi kezäl ylen räkki oli Euroupan enimil čuril. Ezimerkikse Francies, Britanies, Germuanies, Hollandies da Belgies statistiekkah puututtih kaikkien aijoin räkkirekordat.

Suvi-Euroupas räken täh rodih pahua kuivuttu.

Maanviljelijä kerää oliivisatoa Etelä-Ranskassa.
Muanruadai keriäy oliivusualistu Suvi-Francies. Sebastian Nogier / EPA

Ilmastontutkijat ollah ylen huolevuttu sit, gu lämbörekordua oli nähty mennyt vuon, sendäh gu silloi Tyynenmeren el Nino -ilmivyö ei olluh käymäs. El Nino nostau keskimiärästy lämbötilua ymbäri muakeriä.

Ilmaston lämbenemine menöy ylen ruttoh. Copernicusan mugah jälgimäzen viijen vuvven aigua lämbötilat ymbäri Eurouppua ollah oldu kahtu astehtu korgiembat, migu 1900-luvun jälgimäzel puoliškol.

– Lämbenemistrendu on yhtenjyttyine dielo muakerän joga čupul. Sen täh nämmä lämbörekordat roitah vie ylellizembikse, sanoi Copernicusan tutkimusjohtajih kuului Carlo Buontempo Reutersale.

Tämä vuozi sežo on ylen lämmin. Talvikuu 2019, pakkas- da tuhukuu 2020 peräkkäi oldih Euroupas sen aijan miäriändyhistourien kaikkii lämmembät.

Viime vuosi oli Euroopan mittaushistorian lämpimin – Ja ennätykset saattavat paukkua taas tänä vuonna