Parahan fil’man Oscar-ehoitettavakse ielleh voibi piästä vaigu se kino, kudai täyttäy uvvet vuadimukset monimuodožuoh näh

Vuadimuksih liittyy vähembistöjoukkoloin suurembi ozutandu kui valgielkangahal mugai tuotandos.

Yle Uudizet karjalakse
Oscar-patsas
Oscaroi da niilöi jagajua kinoakademiedu jälgivuozinnu on kovah kritikuittu yksipuoližuon täh.A.M.P.A.S

Kinoalan himoitettavii Oscar-palkindoloi jagai Yhtysvalloin kinoakademii on uvvistannuh vuadimuksii, kuduat fil’male pidäy täyttiä. Vaste sit se voijah panna ehoitettavien joukkoh parahan fil’man palkindokategouries.

Vuvven 2024 Oscar-galas algajen kategourieh päitäh ehoitettavakse vaigu moizet fil’mat, kuduat täytetäh monimuodožuon standartat kui kameran ies, mugai sen tagan, nenga sanou The New York Times(siirryt toizeh palveluh) (siirryt toiseen palveluun).

Valgielkangahal vuadimus täytetäh nenga, gu vähimyölleh yhten piäroulin ozuttelijale libo keskeizen sivuroulin ozuttelijale pidäy kuuluo etnizeh vähembistöh Yhtysvallois.

Variantan ezimerkikse 30 prosentua pienembien rouliloin ozuttelijois pidäy olla naizii, seksuali-libo sugupuolivähembistölöih kuulujii, etnizih vähembistölöih kuulujii libo niistielöi.

Uvvet vuadimukset koskietah sežo tuotanduo, kus vähembistökiindivölöi pidäy novvattua kaikil tazoloil praktikantois johtajissah.

Parahan fil’man kategouries ehoitettavaksepanendu rippuu vastavažuos sit, kui hyvin tarvittavu vuitti nämmis standartois on kinos täytetty. Yhtelläh ei pie vältämättäh täyttiä kerras kaikkii vuadimuskohtii.

– Kuvačupule pidäy levetä ozuttamah muailmansuurustu monimuodostu rahvahalistuo kui fil’moin tuotandos, mugai niilöin kaččojis. Uskommo, gu nämmä monimuodožuon standartat pannah rattahile jo vuotetun muutoksen kinoalal, nenga sanotah kinoakademien johtajat David Rubin da Dawn Hudson The Guardianin(siirryt toizeh palveluh) (siirryt toiseen palveluun).

Jälgivuozinnu Oscaroi on kritikuittu yksipuolizis ehoitettavaksepanendois, kus ezimerkikse kai ehoitetut ollah oldu valgiet. Oscaroin azetelmois on nähty, gu alan tilua kuvastettas niilöis leviembäh.

Tänä vuon parahan fil’man Oscar-palkindon voitti enzimästy kerdua ei-anglienkieline, suvikoreilaine kino Parasite.

Parhaan elokuvan Oscar-ehdokkaaksi voi jatkossa päästä vain, jos elokuva täyttää uudet vaatimukset monimuotoisuudesta